Ирээдүйн тив, дэлхийн аваргыг бэлтгэх “Спортын төрөлжсөн сургалттай долдугаар дунд сургууль”-ийг орон нутгийн төсвийн 2,4 тэрбум төгрөгөөр барьж ашиглалтад оруулжээ. Ингэснээр спорт сонирхдог, хичээллэдэг хүүхдүүд, тамирчид бэлтгэл сургуулилтаа хийх бүрэн боломжтой болсон байна. Монгол Улсын хэмжээнд спортын төрөлжсөн сургууль найм байдаг бол 240 хүүхдийн багтаамжтай долдугаар дунд сургуулийг ашиглалтад оруулснаар ес дэх сургууль нь болж буйгаараа онцлогтой. Энэ сургуульд хүүхдүүд хөнгөн атлетик, үндэсний бөх, ширээний теннис, бадминтон, үндэсний сур, жүдо, сагсан бөмбөг, гар бөмбөг, шатар, даам зэрэг спортын төрлөөр хичээллэж өөрийгөө хөгжүүлэх боломжтой. Түүнчлэн тус сургууль ашиглалтад орсноор шинээр 35 ажлын байр бий болжээ.
Дашням, Балжинням давхацсан энэхүү баярт үйл явдалд Өмнөговь аймгийн ИТХ-ын дарга Х.Сугир, Засаг дарга Н.Наранбаатар болон холбогдох албаны хүмүүс оролцож баяр хүргэж амжилт хүссэн байна.
