Хайгуулын компаниуд жилээс жилд цөөрч байгаа. Учир нь хайгуулын лицензийн хугацаа дуусч буй юм. УИХ энэ хаврын чуулганаар хайгуулын лиценз дахин олгох эсэх талаар шийд гаргах ажээ.  Хэрэв хайгуулын лиценз олгохгүй бол гурван жилийн дараа Монгол Улс  хайгуулын лицензгүй болно. Өчигдөр “Монголын геологи, хайгуул-2014” чуулга уулзалт Оросын шинжлэх ухаан мэдээллийн төвд эхэллээ. Энэ чуулганд оролцогчид “Гео­логи хайгуулын судалгааг  тас­ралтгүй хийж байх ёстой. Уул уурхайн салбараас  геологи, хайгуулын ажил ямагт тү­рүүлж явдаг.

Гэтэл манай ул­сад геологи хайгуулын ажил тасалдах хэмжээнд хүрч байна” гэсэн геологич цөөн­гүй байлаа. Энэ чуулга уул­залтад Уул уурхайн яам­ны Стратегийн, бод­лого төлөвлөлтиийн газ­рын Гео­логийн бодлогын хэлт­сийн дарга Б.Баатарцогт “Мон­гол Улсын геологийн судал­гааны бодлого, эрх зүй, цаашдын зорилт”, Цө­мийн энергийн газрын Цац­раг идэвхт ашигт малт­ма­лын хэлтсийн дарга Ү.Ган­­баатар “Цацраг идэвхт ашигт малтмалын салбарын өнөө­­гийн байдал, цаашид хэрэгжүүлэх арга хэмжээ” зэрэг сонирхолтой илтгэл тавив. Үүнээс гадна геологийн ажлын үр дүн, тайлангийн чанар, тулгамдаж буй асууд­лын талаар илтгэлүүд хэлэлцүүллээ. Өнөөдөр Монгол ор­ны волфьрам, газрын хо­вор элементийн ордуудын суд­лагдсан байдал цаашид хэрхэн ашиглах талаар суд­лаачид илтгэл тавих юм. Мөн “Алтан нар” төслийн өнгөрсөн онд хийсэн геологи хайгуулын ажлын үр дүнгийн талаар “Эрдэнэ Монгол” компанийн геологич Г.Бат-Эрдэнэ илтгэл та­вих ажээ.   Бас Шинжлэх ухаа­ны академийн Геологи, эр­дэс баялгийн хүрээлэнгийн судлаач Н.Тунгалаг “Олон овоот алтны ордын эрдсийн су­далгааны” тухай илтгэл тавих нь.

Хэдийгээр хайгуулын лиценз олгохгүй байгаа ч жилд улсын төсвөөр хайгуул хийх хөрөнгө оруулалт нэ­мэг­дэж буй юм. Тухайлбал, Зас­гийн газрын үйл ажил­ла­гааны 2012-2016 оны хөтөлбөрт геологи хайгуулын ажилд зарцуулах улсын төсвийн хөрөнгө оруулалтыг нэмэгдүүлнэ гэж тусгасан. Ингээд  2016 онд Монгол Улсын нутаг дэвсгэрийн 40 хувийг  1: 50.000 геологийн зураглалаар бүрхэх төлөв­лөгөө бий.  Уг ажилд өн­гөр­сөн онд 7.3 тэрбум төг­рө­гийн хөрөнгө оруулалт ул­сын төсвөөс хий­сэн.  Энэ онд улсын төсвөөс  10 тэр­бум төгрөг  зарцуулахаар төсөв­лөөд байна.

Харин хувийн хөрөнгөөр гүйцэтгэж байгаа хайгуулын ажил буурч буй юм. Үүнээс нэлээд орд нээгдэж Монгол орны эрдэс баялгийн санг арвижуулж байна. Тухайлбал, өнгөрсөн оны эхний улиралд  есөн тонн нөөцтэй алтны үндсэн таван ордын нөөцийг батлуулжээ. Мөн 1.2 тонн нөөцтэй алтны шороон орд илрүүлсэн аж. Бас 166 мянган тонн цэвэр зэсийн нөөцтэй орд ч байгаа юм.

Энэ онд ашигт малтмалын ордын нөөц, баялгийг тай­лаг­нах систем, ангиллыг бо­ловсронгуй болгоно. Ингэснээр  олон улсын “CRIRSCO” бай­гууллагын гишүүнээр албан ёсоор элсэх бэлтгэл ажил бүрэн хангагдсан хэмээн Уул уурхайн яамнаас мэдээлсэн билээ.  Ашигт малтмалын тухай хуульд нэмэлт өөрчлөлт оруулах тухай хуулийн төслийг Уул уурхайн яамнаас боловсруулсан. Эл хуулийн төслийг Засгийн газраас удахгүй хэлэлцүүлнэ. Төрөөс эрдэс баялгийн салбарт 2025 он хүртэл баримтлах бодлогод Монголын Геологийн алба  байгуулах тухай тусгасан. Монголын геологийн албаны бүтэц зохион байгуулалтыг оновчтой болгох талаар бодлогын баримт бичигт тусгасны дагуу УИХ-д өргөн барих Ашигт малтмалын тухай хуулийн нэмэлт өөрчлөлтийн төсөлд дээрх асуудлыг оруулаад байна.