Засгийн газраас дархлаажуулалтын 10 хоногийг 26 дахь жилдээ зарлан, хэрэгжүүлж байна. Энэ удаагийн аяныг "Томуугаас сэргийлье" уриан дор аравдугаар сарын 1-10-ны хооронд зохион байгуулна. Манай улсын хувьд улирлын томуугийн эсрэг гурван цэнт А хүрээний H1N1, H3N2 гэсэн Б хүрээний хэв шинжийг агуулсан вакциныг БНСУ-ын Green Cross үйлдвэрээс саяхан хүлээн авлаа. 

Томуугийн эсрэг вакцинаар тус өвчлөлт хамгийн өртөмтхий, хүндрэх эрсдэлтэй хүн ам болох хүүхдүүдэд буюу нийслэлд 6 сартайгаас 9 насныхан, аймгийн төвүүдэд 2-5 насны хүүхдүүдийг үнэ төлбөргүй хамруулна. Ингэхдээ харьяа сум, өрхийн эмнэлгүүд болон цэцэрлэг сургууль дээр дархлаажуулалтын түр цэгүүдээр дархлаажуулалт хийх юм. Тухайн хүүхэд сүүлийн нэг сарын хугацаанд томуугийн болон товлолын бусад вакцинд хамрагдаагүй, аливаа халдварт өвчнөөр өвдөөгүй бол эцэг эхийн зөвшөөрлийн дагуу дархлаажуулалтыг хийх юм.

Насанд хүрэгчдийн хувьд дөрвөөс дээш сартай жирэмсэн эмэгтэйчүүд, 65 ба түүнээс дээш насны ахмадууд, архаг суурь өвчтэй иргэд болон эрүүл мэндийн байгууллагын ажилтнуудыг дархлаажуулалтад хамруулна.

Дархлаажуулалт нь зөвхөн нэг хүүхдийг өвчлүүлэхгүй байх тухай асуудал биш бөгөөд олныг хамарсан дэгдэлт, цар тахлаас нийтийн эрүүл мэндийг хамгаалахад чухал үүрэг гүйцэтгэдгийг дэлхий нийтээр хүлээн зөвшөөрсөн юм. Дэлхийн 194 орон бага насны хүүхдийг вакцинаар дархлаажуулж, хүүхдийн өвчлөл, эндэгдлийг бууруулахад үнэтэй хувь нэмэр оруулж байна. Иймд хүүхдээ дархлаажуулалтад бүрэн хамруулж, томуугийн өвчлөлөөс урьдчилан сэргийлэхийг иргэдэд уриалж байна.