Цар тахлын нөхцөл байдал ойрын жилүүдэд үргэлжлэх магадлал өндөр байгааг олон улсын эрдэмтэд тооцоолсон учраас Засгийн газар, Улсын Онцгой комиссоос иргэдийг дархлаа сэргээх нэмэлт бүүстэр тундаа хамрагдахыг уриалж, цаашид авч хэрэгжүүлэх зарим арга хэмжээний талаар болон бусад асуудлаар хэвлэлийнхэнд мэдээлэл өглөө.
Засгийн газрын зүгээс цар тахлын амаргүй цаг үед эрүүл мэнд, нийгэм, эдийн засгаа хамтад нь авч явах бодлого баримтлан ажиллаж буй. Ковидын үеийн нийгэм, эдийн засгийн хүндрэлийг бууруулах чиглэлээр Засгийн газар, Улсын онцгой комиссоос авч хэрэгжүүлсэн хамгийн чухал ажил бол нийт хүн амынхаа 65.7 хувийг 2 тун вакцинд хамруулах ажлыг эрчимжүүлсэн. Гэвч мутацид орсон шинэ хувилбарууд вакцины үйлчлэлийг бууруулж байгаа учраас дархлаа сэргээх нэмэлт 3-р тунд иргэдээ идэвхтэй хамруулах зорилтот ажлыг Монгол Улсын Засгийн газраас улс, нийслэл даяар зохион байгуулж байна.
Өнөөдрийн байдлаар вакцины 2 тунд нийт хүн амын 69 хувь, 3 дугаар тунд 23 хувь хамрагджээ.
Харин вакцинжуулалтын нэгдүгээр тундаа хамрагдаагүй 116 мянга, хоёрдугаар тундаа хамрагдаагүй 103 мянган иргэн байгаа нь халдвар нэмэгдэх эрсдэлтэй байгааг Монгол Улсын Шадар сайд, УОК-ын дарга С.Амарсайхан хэллээ.
Тэрбээр “Вакцинтай тулдаа бид хатуу хөл хорио тогтоолгүйгээр ажил, амьдралаа хэвийн явуулж, хичээл сургалтаа танхимаар үргэлжлүүлэх боломж бүрдсэн. Цаашид Засгийн газар, УОК-ын зүгээс бизнес эрхлэгч иргэд, аж ахуйн нэгжүүдээ дэмжиж, ажил, амьдралаа хэвийн үргэлжлүүлэх боломжийг бүхий л шатанд хангахаар ажиллаж байгаа. Иймд эрсдлээс урьдчилан сэргийлэхийн тулд иргэд дархлаа сэргээх нэмэлт тундаа хамрагдахыг уриалж байна” хэмээв.
Өнөөдрөөс урлаг, соёл, спортын болон үйлдвэр үйлчилгээний салбарын үйл ажиллагааг танхимын 50 хувийн дүүргэлттэйгээр эхлүүлсэн.
Үзвэр үйлчилгээ үзэх иргэд нэмэлт тунд хамрагдсан гэрчилгээгээ үзүүлж үйлчлүүлнэ. Эсвэл 20 мянган төгрөгөөр түргэвчилсэн шинжилгээг газар дээр нь өгч үзвэр, үйлчилгээ үзэх боломжтой юм.
Монгол Улсын Засгийн газраас нэмэлт бүүстэр тунд зорилтот бүлгийн хамрагдалт 50-иас дээш хувьд хүрсэн тохиолдолд улбар шараас шар түвшинд шилжих зорилт тавьж ажиллаж байна.
