Өршөөлийн тухай хуулийн төслийг УИХ-ын Хууль зүйн байнгын хороогоор хэлэлцэж эхэллээ. Хуулийн төслийг Хууль. зүй, дотоод хэргийн сайд Х.Нямбаатар танилцууллаа.
УИХ нийтдээ зургаан удаа буюу
- 1991 онд
- 1996 онд
- 2000 онд
- 2006 онд
- 2009 онд
- 2015 онд Өршөөлийн хуулийг баталжээ.
Тулгар төр байгуулагдсаны 2030 жил, Их Монгол Улсын 815 жил, Ардын хувьсгалын 100 жилийн ойг тохиолдуулан хүмүүнлэг, энэрэнгүй ёсны зарчмыг удирдлага болгон коронавируст халдвар /КОВИД-19/-ын цар тахлын нийгэм, эдийн засагт үзүүлэх сөрөг нөлөөллийг бууруулах зорилгоор зарим гэмт хэрэг, зөрчил үйлдсэн хүн, хуулийн этгээдийг эрүүгийн хариуцлага, зөрчлийн болон бусад шийтгэлээс нэг удаа өршөөн хэлтрүүлэх, чөлөөлөх, хасах, ялын төрлийг солихтой холбогдсон харилцааг зохицуулахад оршино хэмээн тодорхойлжээ.
2021 оны зургадугаар сарын 24-ны байдлаар хорих ангид 4154 хоригдол байгаа аж. Түүнчлэн цагдан хорих таслан сэргийлэн арга хэмжээ авагдсан 1200, баривчлах шийтгэл эдэлж буй 104, хорихоос өөр төрлийн ял албадлагын арга хэмжээ авагдсан 4529, нийт 9987 ялтан хоригдсон этгээд бий. Зөвхөн нэг хүний хоол хүнсэд өдөрт 6000-8000 төгрөг зарцуулдаг.
Хорих анги байгууллагуудын хувьд олон хүн нэг дор цугларах, хяналт тавьж буй албан хаагчид халдвар авах, тээх, дамжуулах эрсдэлтэй тул коронавирусийн халдвар илэрсэн тохиолдолд олон хүн өвчлөх, улмаар хүний амь эрсдэх аюултай гэж үзэж буй байгаа аж.
Өршөөлийн хуульд 2017 оны зургадугаар сарын 30-ны өдрийн 24 цаг 00 минутыг хүртэл хугацаанд 2002 оны нэгдүгээр сарын 3-ны өдөр баталсан Эрүүгийн хуульд заасан гэмт хэрэг үйлдсэн,
2021 оны зургадугаар сарын 24-ний өдрийн 24 цаг 00 минутаас өмнө 2015 оны арванхоёрдугаар сарын 3-ны өдөр баталсан Эрүүгийн хуульд заасан гэмт хэрэг үйлдсэн,
2021 оны зургадугаар сарын 24-ний өдрийн 24 цаг 00 минутаас өмнө Зөрчлийн тухай хуульд заасан зөрчил үйлдсэн тодорхой ял шийтгэл хүлээсэн хүмүүс хамрагдах юм байна.
Мөн 2021 оны долдугаар сарын 1-ний өдрөөс өмнө Үндэсний их баяр наадмын тухай хууль тогтоомжид заасны дагуу үндэсний бөхийн барилдаан болон сур харваанд оролцох эрхээ хасуулсан бөх, сурын харваачид хамаарах аж.
Уг хууль хэрэгжсэнээр:
- 150 хоригдол ялаас бүрэн чөлөөлөгдөж,
- 374 хоригдлын хорих ялыг сольж,
- 469 хоригдлын хорих ялаас хоёр жил хасаж,
- Өсвөр насны 25 хүн, нийт 1,013 хоригдол хамрагдана. Ингэснээр 3,129 хоригдол үлдэнэ хэмээн Хууль зүй, дотоод хэргийн сайд Х.Нямбаатар танилцуулав.
Өршөөлийн хуулийг 2021 оны долдугаар сарын 1-ний өдрөөс эхлэн дагаж мөрдөнө хэмээн заажээ.
