Бидний өдөр тутмын хэрэглээ болсон талхыг үйлдвэрлэхэд давс, исгэгч, ус, гурил зэрэг орцоос гадна ажиллах хүчин шаардлагатай. Иймд гурилын ч юм уу, исгэгчийн үнэ өсөхөд талхны үнэ тодорхой хэмжээнд өснө. Ажиллах хүчний цалин нэмэгдэхэд ч талхны үнэ өсч болно. Товчхондоо, талх хийхэд нөлөөлж буй зардал, мөнгийг судалж үзсэний үндсэнд үнийг нь тогтоох аргачлалыг “үнийг индексжүүлэх” гэж хар үгээр тайлбарлаж болох юм. Цахилгаан, эрчим хүчний хувьд ч ялгаагүй. Унтраалга дарахтай зэрэгцэн асч байгаа гэрлийг үйлдвэрлэхэд нүүрс, мазут, галлагааны дизель түлш, хэрэглээний үнийн өөрчлөлт, татвар, хууль, шийдвэрийн өөрчлөлт, цалин тэтгэврийн нэмэгдэл зэрэг зүйлс нөлөөлж байдаг. Тиймээс дээрх зүйлсийн аль нэгд өөрчлөлт орсон үед үнийг дахин шинээр тогтоож болно гэсэн үг юм.

Энэ дагуу Эрчим хүчний зохицуулах хорооны Үнэ тарифын бодлого зо­хицуу­лалтын хэлтсээс оруул­сан асуудлыг Эрчим хүчний зохицуулах хорооны удирд­лагууд хэлэлцээд “Эрчим хүчний үнэ тарифыг индекс­жүүлэх” журмыг өнгөрсөн сарын 7-ны өдөр баталж, эрчим хүчний үнэ тарифыг 9.85 хувиар, дулааны эрчим хүчний үнэ тарифыг 13 хувиар тус тус индексжүүлж, хэрэглэгчдэд борлуулах эрчим хүчний үнэ тарифыг шинэчлэн тогтоож, энэ сарын 5-наас мөрдөх гэж байна.

Ингэснээр тусгай зөвшөөрөл эзэмшигчдийн үйл ажиллагаанаас үл хамааран эрчим хүч үйлдвэрлэх, дамжуулах, түгээх, хангах зардалд нөлөөлөх хүчин зүйлд үндэслэн эрчим хүчний үнэ тарифт өөрчлөлт орлоо. Өөрөөр хэлбэл, Дулааны II, III, IV цахилгаан станц, Дархан, Багануур, Налайх, Дорнод бүсийн эрчим хүчний систем зэрэг иргэдэд цахилгаан дамжуулдаг 84 байгууллагын үйл ажиллагаанаас үл хамааран цахилгааны үнийг тогтоож байгаа юм. Энэхүү журам хэрэгжиж эхэлснээр иргэд буюу айл өрх энгийн тоолууртай, сарын нийт хэрэглээ нь 150 кВт.ц хүртэлх бол 94.10 төгрөг, 150 кВт.ц болон үүнээс дээш хэрэглээтэй байсан бол тус, тус нэг кВц-г 113.90 төгрөгөөр тооцох болж байгаа юм. (Эрчим хүчний өөрчлөгдсөн үнийн хүснэгтэд дэлгэрэнгүй)

Эрчим хүчний хорооны журам батлах тухай тогтоолд эрчим хүчний үнэ, тарифыг жилд дөрөв хүртэл удаа индексжүүлж болно гэж заажээ. Энэ нь эрчим хүч үйлдвэрлэгдэхэд ашиглагдах түлш, гадаад валютын ханш­ны өөрчлөлт ба гадаад ор­ны үйлдвэрлэгчийн үнийн индексийн нөлөөлөл, урс­гал засварын зардал, хэрэглээний үнийн индексийн нөлөөлөл зэрэг өөрчлөгдөхөд тухай бүрт нь эрчим хүчний үнийг өөрчлөн тогтоож болно гэдгийг хэлж байгаа юм. Өөрөөр хэлбэл, эрчим хүчний үнэ байнга өсөх бус дээр дурдсан болон бусад шалт­гааны улмаас буурч болох гаргалгаа. Гэхдээ валютын ханш өслөө, буурлаа гэх бү­рийд цахилгааны үнийг өөрч­лөхгүй бөгөөд үнэ тарифыг индексжүүлэхэд хэд, хэдэн зарчмыг баримтлахаар бол­жээ. Тухайлбал, түлш­ний үнийн өөрчлөлтийг тоо­цох­доо Эрчим хүчний зохицуулах хорооноос хяна­сан нүүрсний үнэ, УБТЗ-ын тогтоосон тээврийн хөлс, мазут, дизель түлш худалдах, худалдан авах гэрээний үнэд үндэслэх аж. Мөн хэрэглээний үнийн ин­декс, үйлдвэрлэгчийн үнийн индекс, валютын ханш­ны өөрчлөлтийг Үндэсний ста­тистикийн хорооноос гар­га­сан сарын болон жи­лийн мэдээлэлд үндэслэх юм байна.  

Үйлдвэр, аж ахуйн нэгж, байгууллагад борлуулах цахилгааны  тарифыг (НӨАТ-гүй) ангиллаас нь хамааруулан төлбөр тооцох үзүүлэлтийн нэгжид дараах байдлаар тогтоохоор болжээ

Айл өрхөд борлуулах цахилгааны тарифыг (НӨАТ-гүй) ангиллаас нь хамааруулан төлбөр тооцох үзүүлэлтийн нэгжид дараах байдлаар тогтоохоор болжээ

Ахуйн тоолуургүй цахилгаан хэрэглэгчдийн төлбөр тооцох сарын дундаж хэрэглээг төлбөр тооцох үзүүлэлтийн нэгжид дараах байдлаар тогтооно (Хуучин үнэд өөрчлөлт ороогүй)