Ирэх онд Монгол Улсад нисэх хүчин үүсч хөгжсөний 95 жилийн ой тохионо. Энэхүү ойг тэмдэглэн өнгөрүүлэх ажлын хүрээнд ажилтнуудаас авсан бүтээлч ажлын саналд иргэний нисэхийн салбарынхан олон сонирхолтой бүтээлч ажлуудыг тусгажээ.
Тухайлбал, “Чингис хаан” Олон улсын нисэх буудлын хойно, Буянт-Ухаа 1 хорооллын урд байрлах цэцэрлэгт хүрээлэнд нисэхийн байгууллагуудын гадна үзмэр болгон байрлуулсан нисэх онгоцнуудыг нэгтгэн байрлуулж, нисэх хүчний онцлогийг харуулсан цэцэрлэгт хүрээлэн байгуулах, улсын баяр наадмаас дутахгүй хөл хөдөлгөөн болгосон агаарын уран үзүүлбэрийг дахин үзэх, нисэхийн салбарт үр бүтээл, идэвхи чармайлттай ажилласан болон ажиллаж буй 95 ажилтнаас ярилцлага авч, ном болгон хэвлүүлэх, Үндэсний цэцэрлэгт хүрээлэнд хүүхэд сууж зураг авахуулах боломжтой онгоцны загвар хийж байрлуулах, алба хаагчид туршлагаа солилцох “Би мэргэжлээ сольсон нь” ажлыг зохион байгуулах, дотоодын агаарын тээвэрлэгчдийг сурталчлах, дэмжих үүднээс илүү олон хүмүүст, хямд зардлаар, олон сувгаар хүргэх боломжтой Facebook, Instagram-ийг ашиглан “Далавчаа дэв, тэгээд хүсэл мөрөөдлийнхөө зүг нис” сэдэвт азтан шалгаруулах уралдаан зарлах зэрэг олон сонирхолтой шинэлэг саналуудыг ирүүлжээ.
Ажилтнуудаас ирүүлсэн бүтээлч ажлын саналуудыг судалж, 95 жилийн ойн баярын хүрээнд хийх ажлын төлөвлөгөөнд тусгах бөгөөд идэвхитэй оролцож саналаа ирүүлсэн ажилчдад ИНЕГ-ын Тэргүүн дэд дарга Б.Алтанцомоор ахлуулсан ойн баярыг зохион байгуулах комиссын зүгээс талархал илэрхийллээ.
