Холливудын тулаант киноны гол дүрүүдийг залуу насандаа эзэгнэгчдийн нэг гэдгээр нь Стивен Сигал хэмээх нэрийг дэлхий нийтээрээ андахгүй. Тэрээр буддын шашинтай, монгол гэргийтэй гээд монголчуудтай салшгүй холбоотой болсон нэгэн. Өнгөрсөн долоо хоногийн сүүлээр Стивен Сигал Монголд гэргий Эрдэнэтуяа хүү Кунзанга нарын хамт ирээд байгаа. Мөн түүнтэй хамт Оросын тэргүүлэх баян эрс ирсэн гэх мэдээ дуулдав. Харин Холливудын од Монголд ирээд ходоод гэдэс нь жаахан хямарч, бие нь тавгүйтсэн сурагтай. Тэрээр Монголд ирэхээсээ өмнө Орост тухлан Ерөнхийлөгч В.Путины хүндэт зочин нь байв. Орост ирсэн зорилгоо өөрийн найзуудтай уулзах мөн Оросын дүрэмгүй барилдаан буюу бидний нэрлэдгээр нохой зодооны аварга шалгаруулах тэмцээнийг үзэх гэжээ.
Оросын хэвлэлүүд түүнийг дөрвөн жилийн турш чандлан нууцалж байсан дөрөвдэх гэргий Б.Эрдэнэтуяа түүний хүүгийн хамт ирлээ хэмээн онцлон бичиж. Орост ирсэн өдрөө тэрээр Москва голоор бүхэл оройжин зугаацсан ба гурван сайхан бүсгүй зугаалгын туршид Сигал болон түүний нөхөдтэй хамт байсан гэдгийг папарациуд олзлоод амжив. Гэвч Сигал үдэш хүү гэргий хоёрынхоо хамт буусан Ритц Карлтон зочид буудалдаа тухлахаар буцсан гэв.
Москвагаар зугаалсныхаа маргааш Сигал Сочи руу явжээ. Тэнд Оросын анхны дүрэмгүй зодооны аварга шалгаруулах тэмцээн болж байгаа учраас зочноор оролцох урилгатай байсан аж. Сочид мөн Лондонгийн олимпын баатрууд болох Оросын жүдогийн багийнхан бэлтгэл хийж тэдэнд өөрийн биеэр талархал дэвшүүлэхээр очсон Ерөнхийлөгч Путин Сигалын угтан авч хамт өөрийн жүдочдын татамид нь очиж талархал дэвшүүлсэн аж.
