Тээврийн цагдаагийн албанаас иргэдийн олон нийтийн сүлжээнд байршуулсан үнэн бодит, баримттай мэдээллийн мөрөөр арга хэмжээ авч байгаа. Тэгвэл ирэх сараас Замын хөдөлгөөний удирдлагын төвийн албан ёсны програмд гар утаснаас шууд мэдээлэл илгээснээр дүрэм зөрчигчид арга хэмжээ авах нөхцөл бүрдсэн байна.
Өөрөөр хэлбэл явган хүний зам дээр машинаа байрлуулсан, орц гарц хаасан,  урсгал сөрсөн, гэрлэн дохио зөрчсөн тээврийн хэрэгсэлийн мэдээллийг иргэдээс авч хариуцлага тооцох юм.  Харин иргэд Тээврийн цагдаагийн албанд  мэдээлэл өгөхдөө тухайн зөрчилийг  цаг хугацаатай, он сар өдөртэй зураг, бичлэг зэргээр батлах ёстой аж.
Үүнээс гадна Замын хөдөлгөөний удирдлагын төв, Тээврийн цагдаагийн газар, нийслэлийн Мэдээллийн технологийн газартай хамтран иргэдийн мэдээллийг хүлээн авах програм хангамжийг хийж дууссан байна. Иргэд өөрийн гар утсаар мэдээллийг баталгаажуулж, сервер рүү илгээснээр дүрэм зөрчсөн жолоочид хариуцлага тооцох нөхцөл бүрдэж буй юм.  
 
Нийслэлийн Засаг даргын орлогч П.Баярхүү "Иргэдээс мэдээлэл авах ажилд  ихээхэн найдлага тавьж байгаа. Түгжрэлийн хамгийн гол шалтгаан нь жолооч нар дүрэм зөрчсөнөөс үүддэг. Өнөөдөр 300 гаруй цагдаа бүрэн хянаж чадахгүй байгаа учраас иргэд биенээ хянадаг болно. Иргэд дүрэм зөрчсөн бүхний зургийг нь явуулж, тэр нь гэрийнх нь хаягаар торгуул болж очоод байвал бид Улаанбаатар хотыг бүхэлд нь хянах боломжтой болно. Ингэснээр хөдөлгөөнд соёлтой оролцож, замын хөдөлгөөний дүрэм биелэгдэж эхэлнэ" хэмээн тайлбарлаж байна.