Дэлхийн хараагүйчүүдийн холбооны Ази номхон далайн бүсийн орнуудын чуулга уулзалт өчигдрөөс манай улсад эхэлсэн билээ. Уг чуулга уулзалтад дэлхийн хараагүйчүүдийн холбооны ерөнхийлөгч болон Ази номхон далайн бүсийн 18 улсын хараагүйчүүдийн байгууллагын удирдлага, хараагүйн чиглэлээр үйл ажиллагаа явуулдаг олон улсын байгууллагын төлөөлөл болсон 120 шахам төлөөлөгчид манай улсад ирсэн. Харин улсаа төлөөлж 100 гаруй гишүүн энэхүү чуулганд оролцож байна.

Тухайлбал, Монгол Улсын Ерөнхий сайд У.Хүрэлсүх, ХНХ-ын сайд С.Чинзориг болон албаны 30 гаруй хүн урилгаар оролцож Монгол Улс хөгжлийн бэрхшээлтэй иргэддээ хэрхэн анхаарал хандуулж байгаа талаар мэдээлэл хийх юм байна. Мөн  төрийн хоёр дахь шатлалын нэгжид үйлчилгээ үзүүлдэг байгууллагуудын мэргэжилтнүүд оролцон хараагүй иргэдэд зориулсан тусгай үйлчилгээ гэж юу болох, дэлхийн улс орнуудын төр засгийн зүгээс уг үйлчилгээг хэрхэн хүргэдэг талаар мэдлэг хуримтлуулах аж. Дэлхийн сайн туршлагаас суралцан Монголын хараагүй иргэдийн амьдралд бодитоор нэвтрүүлэх сайхан боломж бүрдсэн чуулгын эмэгтэйчүүдийн форум нь өнөөдөр 14:00 цагт “Нoliday inn” зочид буудалд зохион байгуулагдах нь.