Хэдийгээр хичээлийн шинэ жил эхлэхэд нэг сарын хугацаа үлдээд байгаа ч жил бүрийн есдүгээр сарын 1-ний өдөр сургууль, цэцэрлэгтээ догдлон ирэх хүүхдүүдээ “Хүлээн авах боломжгүй ээ” гээд буцаадаг Ерөнхий боловсролын сургууль, цэцэрлэг цөөнгүй байдаг.
Тиймээс энэ жил энэ асуудлыг хэрхэн шийдэж байгаа болоод засварын ажлын талаар БСШУЯ-ны Барилга захиалагчийн албаны ажилтан Д.Батжаргалаас тодруулсан юм.
-Өнөөдрийн байдлаар сургууль цэцэрлэгийн засварын ажил хэдэн хувьтай байна вэ?
-Нийт 378 сургууль, цэцэрлэгт засварын ажил хийхээр төлөвлөсөн. Засварын ажил одоогоор 35 хувьтай явж байна. Энэ байдлаараа явбал есдүгээр сарын 1 гэхэд засварын ажил дуусаад улсын комисст хүлээлгээд өгчих байх гэж бодож байна.
-Засварын ажилд хэдэн төгрөг төсөвлөсөн бэ. Засварын ажил нь эхлээгүй сургууль, цэцэцрлэг байгаа юу?
-Улсын хэмжээнд 16 тэрбум төгрөг хуваарилсан. Ер нь, цөөхөн хэдэн газар үлдээд байгаа. Гэхдээ амжаад дуусгах төлөвлөгөөтэй учраас нэрийг нь дурдаад яахав дээ.
-Өнгөрсөн жил есдүгээр сарын 1-нд хичээлийн шинэ жилийн нээлтээ хийж чадахгүй сургууль ,цэцэрлэг цөөнгүй байсан. Энэ жил иймэрхүү асуудал гаргахгүй гэх баталгаа байгаа юу?
-Гүйцэтгэгч байгууллагуудын ажлын явцаас болж ноднин жил жаахан оройтсон. Харин энэ жил бүх гүйцэтгэгч хугацаандаа ажлаа эхэлсэн учраас энэ жил ийм явдал гарахгүй байх аа. Наймдугаар сарын 25-наас есдүгээр сарын 1-ний өдөр гэхэд улсын комисс засварын ажил хийсэн бүх сургууль, цэцэрлэгийн ажлыг хүлээж авах ёстой.
