Энэ онд улсын хэмжээнд 513,2 мянган га-д тариалалт хийсэн. Тхуайлбал, улаанбуудай 390.4, төмс 15.5, хүнсний ногоо 8.4, тэжээлийн таримал 32, тосны ургамал 41.9, жимс жимсгэнэ 6.5 мянган га-д тус тус тариалжээ.
Ингээд энэ оны ургац хураалтаар дотоодын хэрэгцээг бүрэн хангана хэмээн үзэж буй юм.
Урдчилсан тооцоогоор
518.7 мянган тонн улаанбуудай,
171.2 мянган тонн төмс,
101.9 мянган тонн хүнсний ногоо,
64 мянган тонн малын тэжээл,
34.2 мянган тонн тосны ургамал,
3 мянган тонн жимс, жимсгэнэ хураан авна.
Энэ жил бороо хур элбэг тул боломжийн хэмжээнд ургац хураан авч төлөвлөсөн хэмжээнд хүрч дотоодын хэрэгцээгээ бүрэн хангана хэмээн газар тариалангийн мэргэжилтнүүд хэлж буй юм.
Ургацын бланс Наймдугаар сарын 20-нд гарна хэмээн ХХААХҮЯ-наас мэдээлж байна. Ургац хураалтын үед аймаг бүрт Ургацын штаб байгуулж, Улсын ургацын штабтай хамтран шуурхай ажиллана.
Ургацын урьдчилсан балансаар тогтоосон ургацаа амжилттай хураан авахын тулд ургац хураалтын үед болон хураалтын дараах үтрэмийн ажилд цаг агаарын болзошгүй эрсдэл гарахаас урьдчилан сэргийлэх зорилгоор эрдэм шинжилгээ, судалгааны байгууллагууд, туршлагатай тариаланчидтай хамтран ургац хураалтын технологийн зөвлөмж боловсруулах чиглэлийг ХХААХҮ-ийн сайд Б.Батзориг Аймаг, нийслэлийн Засаг дарга нарт өгчээ.
Мөн ургац хураалтад шаардлагатай бүхий л бэлтгэл ажил тэр дундаа хүн хүч, тоног төхөөрөмжийн бэлэн байдлыг хангаж, ургацын талбайд борооны ус орохоос сэргийлж хамгаалалт хийхийг анхаарууллаа. Түүнчлэн үтрэмийн талбайг цэвэрлэж, ургац хүлээн авах шаардлагад нийцүүлэх, ургац хураалтын үед гарах хүнсний ногооны иш навчийг талбайд хаялгүй тэжээлд нөөцлөх, даршлах нь зүйтэй хэмээн мэргэжилтнүүд хэлж байна.
