Мэргэжлийн сүмогийн 70 дахь аварга Харүмафүжи Д.Бямбадорж Кюүшюү башёгийн эхний хоёр өдөр тун амжилтгүй барилдаж, өвдөг шороодсон. Тэгвэл өнөөдрөөс башёг өнжихөөр болсон тухай Японы хэвлэлүүд бичиж эхлэв. Учир нь Харүмафүжи аварга хоёр долоо хоногийн өмнө Монгол бөхчүүдийн уулзалтын үеэр Таканоива А.Баасандоржийн толгой руу шар айрагны шилээр цохиж гэмтэл учруулсан талаар Japantimes мэдээлсэн байна.
Үүний улмаас Харүмафүжи Д.Бямбадорж Кюүшюү башёд барилдахгүй өнжих хүсэлтээ Сүмогийн холбоонд илгээсэн бөгөөд "Би хүндрэл учруулсандаа уучлалт гуйж байна" гэж болсон явдлыг хүлээн зөвшөөрчээ.
Японы сүмо бөхийн холбоо маэгаширагийн наймд эрэмбэлэгдсэн Таканоивагийн тархи нь хөдөлж, гавлын яс нь цуурсны улмаас арваннэгдүгээр сарын 5-9-нд эмнэлэгт хэвтүүлж эмчлүүлсэн гэдгийг өчигдөр албан ёсоор мэдээлсэн байна
Тиймээс өнөөдөр Японы сүмогийн холбооны тэргүүн Хаккакү, холбооны удирдлагууд Фүкүока Кокүсай төвд цуглаж, Харүмафүжи аварга хийгээд Исэгахама дэвжээний ояката нараас мэдүүлэг авсан гэнэ.
