Дэлхийн аялал жуулчлалын байгууллагаас "Дэлхийн аялал жуулчлалын өдөр"-ийг уламжлал ёсоор энэ сарын 27-нд зохион байгуулахаар зэхэж байна. Энэ өдрийг жил бүр тодорхой сэдвийн дор, аялал жуулчлал хөгжиж буй оронд зохиодог билээ. Өнгөрсөн жил манай улс “Аялал жуулчлал-бид бүгдэд” уриан дор тэмдэглэн өнгөрүүлсэн бол энэ жил “Аял. Таашаа. Хүндэл” сэдэвт хүрээлэн буй орчинд сөрөг нөлөөгүй аялан жуулчлахыг сурталчлах өдөрлөгийг Сүхбаатарын талбайд зохион байгуулахаар болсон байна. Мөн энэ өдөр Монголын аялал жуулчлалын салбарынхан нэгдэж “Нүүдлийн аялал жуулчлалыг хөгжүүлэх нь” эрдэм шинжилгээний бага хурал, "Бүх нийтийн аялал жуулчлалын боловсрол” сэдвээр их дээд сургуулийн аялал жуулчлалын оюутнуудын дунд олимпиад зохиохоор болсон байна. Дашрамд сонирхуулахад, 1979 оны есдүгээр сард Испани улсын Торремолинас хотод болсон НҮБ-ын харьяа “Дэлхийн аялал жуулчлалын байгууллага”-ын ерөнхий ассамблейн III чуулганаас жил бүрийн есдүгээр сарын 27-ны өдрийг “Дэлхийн аялал жуулчлалын өдөр” болгон тэмдэглэхээр шийдвэрлэсэн аж. Манай Улс 1990 онд ДАЖБ-ын гишүүнээр элсч, 2007 оноос эл өдрийг салбарын хэмжээнд тэмдэглэсээр ирсэн юм.
