Монгол Улсын Засгийн газрын шийдвэрээр 2009 оноос эхлэн ерөнхий боловсролын сургуулийн бага ангийн сурагчдыг 100 хувь, дунд, ахлах ангийн сурагчдын 40 хувийг сургуулийнх нь номын сангаар дамжуулан үнэ төлбөргүй сурах бичгээр хангах ажлыг зохион байгуулж ирсэн. Энэ жил ч бас бага ангийн сурах бичгийг төрөөс хариуцаж, дунд, ахлах ангийн бүтэн өнчин, хөгжлийн бэрхшээлтэй хүүхэд, амьжиргааны баталгаажих түвшингээс доогуур орлоготой өрхийн болон ЕБС-д гурав буюу түүнээс дээш хүүхэд нь суралцдаг өрхийн хүүхдийн сурах бичгийг үнэгүй хангахаар болжээ.
Харин дунд, ахлах ангийн сурагчдын 60 хувь нь сурах бичгээ зах зээлээс худалдан авах юм байна. Зах зээлд худалдах сурах бичгийг долоодугаар сараас эхлэн худалдаанд гаргахаар хэвлэлийн газруудтай гэрээ хийж, хэвлэх ажлыг эхлүүлсэн аж.
Дунд ангийн сурах бичгийн дундаж үнэ 2200, ахлах ангийнх 3420 төгрөг, харин өмнө нь хэвлэгдсэн сурах бичгүүд хуучин үнээрээ худалдаалагдах юм байна.
Мөн нэгдүгээр ангийн нэг сурах бичгийн дундаж жин 140 грамм, нийт жин 1.5 килограммаас хэтрэхгүй байх гэнэ.
