Б.СЭВЖИДМАА
АНУ-ын Ерөнхийлөгч Дональд Трамп ОХУ-ын төрийн тэргүүн В.Путиний тухай сөрөг мэдээлэлд үл итгэдэг, түүнийг хүндэлдэг, сайхан харилцаа тогтоох бодолтой гэдгээ нэг биш удаа хэлж байсан. Тэгвэл тэрээр Ерөнхийлөгч болсноос хойшхи анхны томоохон ярилцлагадаа В.Путинийг дахин нэг удаа өмгөөлсөн нь үзэгчдийн анхаарлыг татлаа. Д.Трамп “Fox News”-т ярилцлага өгөх үеэрээ ОХУ-ын Ерөнхийлөгчийг хүндэлдэг гэдгээ хэлэхэд нь сэтгүүлч “Гэхдээ тэр алуурчин шүү дээ” гэж мэтгэжээ. Үүний хариуд Трамп “Манайд ч зөндөө алуурчин бий. Та өөрсдийгөө гэмгүй гэж бодоо юу. Манай улс ч маш их аллага үйлдсэн гэдгийг та мэднэ. Энэ дэлхийгээр нэг тэнэглэл болж байна. Маш их аллага гарч байна” хэмээн хариу барьжээ.
Трамп хэдий В.Путинийг хүндэлдэг ч гэлээ энэ нь түүнтэй учраа олоод, ойлголцоод явна гэсэн үг биш гэдгийг хүлээн зөвшөөрчээ. “Оростой эвдрэлцэж байснаас учраа олоод явсан нь дээр гэж хэлэх байна. Хэрэв Исламын улс бүлэглэл, исламын алан хядлагын эсрэг тэмцэлд ОХУ бидэнд туславал сайн хэрэг. Гэхдээ би тэдэнтэй учраа олох болов уу гэж үү? Одоохондоо надад мэдэх юм алга” гэжээ.
Трамп, Путин нар долоо хоногийн өмнө утсаар ярьж, Исламын улсын эсрэг хэрхэн шийдвэртэй тэмцэх талаар санал бодлоо солилцсон билээ. Трампын Ерөнхийлөгчийн сонгуулийн ялалтад В.Путиний оролцоо дэмжлэг их бий гэж АНУ-ын тагнуулын байгууллага, өмнөх Ерөнхийлөгч Б.Обама үздэг. Тийм ч учраас Трампын жилүүдэд АНУ-ОХУ-ын харилцаа сайжирна гэсэн хүлээлт байгаа. Ялангуяа Төрийн нарийн бичгийн даргаар ОХУ-тай найрсаг харилцаатай Рекс Тиллерсоныг томилсны дараа энэ хүлээлт бүр лавширсан юм.
