Б.СУВД
Узбекистаны Ерөнхийлөгчөөр сонгогдсон Шавкат Мирзиёев парламентын хоёр танхимын хамтарсан хуралдааны үеэр тангаргаа өргөлөө. Тус улсад энэ сарын 4-нд Ерөнхийлөгчийн сонгууль болж, Либерал-Ардчилсан намаас нэр дэвшсэн Мирзиёев 88.61 хувийн саналаар ялсан билээ. Узбекистаны Сонгуулийн төв хорооны дарга Мирза-Улугбек Абдусаломов Ш.Мирзиёевд Ерөнхийлөгчийн гэрчилгээг гардуулан өгчээ. Үүний дараа Ш.Мирзиёев Үндсэн хууль болон Коран судар дээр гараа тавьж, “Үндсэн хууль ба дүрмийг даган мөрдөж, хүний эрх, эрх чөлөөг хамгаалж, хүлээсэн үүргээ үнэнч шударгаар биелүүлэх болно” гэдгээ амлав.
Узбекистаныг 25 жилийн турш удирдсан Ерөнхийлөгч Ислам Каримов энэ оны есдүгээр сарын 2-нд таалал төгссөний дараа тус улсад Ерөнхийлөгчийн ээлжит бус сонгууль явуулсан.
Ш.Мирзиёев өмнө нь Засгийн газрын тэргүүний албыг хашиж байсан Харин төрийн тэргүүн нь таалал төгсөх үед албыг нь орлож байсан юм.
