“Time” сэтгүүл 2016 оны “Оны хүн”-ээ нэрлэжээ. АНУ-ын Ерөнхийлөгчөөр аль намын хүн сонгогдохоос шалтгаалж, дэлхийн улс төрийн ирэх жилүүдийн зураглал тодорхой болдог. Тиймээс шинэ Ерөнхийлөгчийн бодлого дэлхийн улс орнууд, бүс нутгуудын ирэх дөрвөн жилийн байдлыг тодорхойлогч нь болдог гэхэд болно. Тиймээс ч АНУ-ын Ерөнхийлөгчөөр сонгогдсон Доналд Трампыг “оны хүн”-ээр тодруулснаа “Time” сэтгүүл зарласан байна. Уг сэтгүүлээс гаргасан мэдэгдэлд “Бид 90 дэх жилдээ дэлхийн хамгийн нөлөө бүхий хүнийг “оны хүн”-ээр тодрууллаа. Тухайн хүн сайн эсвэл муу талаараа ч нөлөө бүхий байж болно. Энэ “оны хүн” таны хувьд “Сайн хүн үү эсвэл муу хүн үү” гэжээ. Харин Доналд Трамп хэвлэлийн төлөөлөгчөөрөө дамжуулан “миний хувьд “оны хүн”-ээр тодорсон нь нэр төрийн хэрэг юм. Маш их баярлаж байна” гэжээ. Нью-Йорк хот дахь “Trump Tower” цамхгийн дээвэр дээр авахуулсан Доналд Трампын гэрэл зураг тус сэтгүүлийн нүүрэн дээр тавигдсан байна. Мөн уг зургийн хажууд “Хуваагдсан улсын Ерөнхийлөгч Д.Трамп” гэж бичжээ. “Time” сэтгүүл 1927 оноос хойш “оны хүн”-ийг тодруулж байгаа юм.
