Б.БАДРАЛ
Өмнөд Солонгосын прокурорууд тус улсын түүхэнд анх удаа Ерөнхийлөгчөөс байцаалт авч болзошгүй тухай “Ренхап” агентлаг мэдээлэв. Ерөнхийлөгчийн найз гэгдсэн Цой Сун Силийн авлигын хэрэгтэй холбоотойгоор Пак Гөн Хигээс байцаалт авах шаардлагатай гэж үзжээ. Хэргийн эзэн Цой Сун Силийг түр саатуулах хугацаа арваннэгдүгээр сарын 20-нд дуусч, Ерөнхийлөгчөөс байцаалт авч магадгүй хэмээн “Ренхап” агентлаг онцолжээ. Өмнөд Солонгосын түүхэнд албан үүргээ гүйцэтгэж байгаа Ерөнхийлөгчөөс байцаалт авч байсан тохиолдол өмнө нь гарч байгаагүй аж.
Ерөнхийлөгч Пак Гөн Хи нь шаардлагатай гэж үзвэл тус хэрэгтэй холбоотой байцаалт өгөхөд бэлэн тухайгаа албан ёсоор мэдэгдсэн юм. Өнгөрсөн бямба гарагт Сөүл хотод Ерөнхийлөгчийг эсэргүүцсэн, огцрохыг шаардсан 260 мянга гаруй хүн оролцсон сүрт жагсаал болж, жагсагчид болон цагдаа нарын хооронд мөргөлдөөн гарсны улмаас дөрвөн хүн баривчлагдсан байна.
Пак Гөн Хигийн рейтинг нь Өмнөд Солонгосын түүхэнд байгаагүй доод түвшинд буюу 5 хувьд хүрч, солонгосчуудын 90 хувь нь түүний бодлогыг дэмжихгүй гэжээ.
Ерөнхийлөгчийг чухал шийдвэр гаргаж, олны өмнө мэдэгдэл хийхийнхээ өмнө Цой Сун Силь рүү явуулж шалгуулдаг, засвар хийлгэдэг байсан гэж буруутгаж буй. Үүнээс гадна Цой Сун Силь нь Ерөнхийлөгчийн итгэлт хүн гэдгээ ашиглан Өмнөд Солонгосын том компаниудад дарамт, шахалт үзүүлэн өөрийн хувийн сангууддаа их хэмжээний мөнгө цуглуулсан гэж буруутгагдаж буй юм.
