Монгол Улсын өсөх идэр начин, гавьяат дасгалжуулагч, хурандаа Д.Дашжамцын нэрэмжит жүдо бөхийн өсвөр үеийн 14 дэх удаагийн тэмцээн Монгол бөхийн өргөөнд болж өнгөрлөө. Тэрээр 1975 онд тухайн үеийн Нийгмийг аюулаас хамгаалах яамны “Хүч” нийгэмлэгийн анхны таван тамирчны нэг болж улс, олон улсын чанартай тэмцээнүүдэд олон удаа түрүүлж, 1980 оны Москвагийн Зуны олимпын XXII Их наадамд амжилттай оролцож байсан шилдэг тамирчдын нэг билээ. Түүгээр ч зогсохгүй Монгол Улсын Хөдөлмөрийн баатар, гавьяат тамирчин, дархан аварга Б.Бат-Эрдэнэ, гавьяат тамирчин, Улсын арслан Д.Мөнх-Эрдэнэ, улсын заан Д.Хишигдорж, Ч.Бямбадорж, С.Сүхбаатар, улсын начин Р.Цоггэрэл, Д.Сүхбат, Б.Эрдэнэбилэг, С.Баатар, Монгол Улсын гавьяат тамирчин Д.Баттулга, Н.Баатарболд, Д.Пүрэвсүрэн нарын шилдэг тамирчдыг төрүүлэн гаргасан алдартан юм. 2001 онд Н.Лхамсүрэнгийн хамтаар Монгол Японы хамтарсан жүдо бөх хөгжүүлэх “MJ” нийгэмлэгийг байгуулснаасаа хойш жил бүр дээрх тэмцээнийг уламжлал болгон зохион байгуулж ирсэн юм. Түүнчлэн жүдо бөхөөр хичээлэлдэг амьдралын түвшин доогуур хүүхдүүдэд тэтгэлэг олгож, Япон улсад хамтарсан бэлтгэл хийх, тэмцээнд оролцох нөхцөл боломжоор хангаж, дасгалжуулагчдыг мэргэжил дээшлүүлэх сургалтад хамруулж байсан билээ. Энэ удаагийн тэмцээнд хот, хөдөөгийн 30 байгууллагын 389 тамирчин оролцож аваргуудаа тодруулжээ.