Б.БАДРАЛ
АНУ-ын Ерөнхийлөгчийн сонгуулийн өдөр ойртох тусам нэр дэвшигчдийн зүгээс өрсөлдөгчөө харлуулсан, буруутгасан материал цацах нь газар авч байна. Трамп өрсөлдөгчөө хэвлэл мэдээллийн хэрэгслүүдийг худалдан авч өөрийг нь харлуулах мэдээллийн дайн эхлүүлсэн, тусгай албад дахь холбоо сүлбээгээ ашиглан өөрийн алдааг нуун далдалж байна гэж буруутгаж буй. 
Сүүлийн үед Трампыг бэлгийн хүчирхийлэлд буруутгах нэгэн төрлийн хөдөлгөөн эхэлсэн бөгөөд одоогоор 10 гаруй эмэгтэй түүнийг бэлгийн харилцаанд орохын тулд сэтгэл санааны дарамт үзүүлсэн гэж буруутгаад байна. Хамгийн сүүлд гэхэд л Жессика Дрейк гэгч порно од Дональд Трампыг бэлгийн хүчирхийлэлд буруутгав. Дрейк нь 10 жилийн өмнө гольфийн тэмцээний үеэр Трамптай танилцсан, тэр үед Трамп түүн рүү утсаар ярьж сексийн харилцаанд орвол 10 мянган доллар өгнө гэж сэтгэл санааны дарамт үзүүлсэн гэж мэдэгджээ. Трампын сонгуулийн штабаас энэ бүхнийг үгүйсгэж байна. Трамп өөрийг нь буруутгасан эмэгтэйчүүдийн нэгийг нь ч танихгүй гээд тэднийг Клинтоны захиалгаар мэдэгдэл хийж байгаа, эсвэл сонгуулиар далимдуулан нэрд гарахыг оролдож байгаа гэж мэдэгдсэн байна.
