Кувейтийн хаан буюу Эмир шейх Сабах аль-Ахмед аль Жабер ас Сабах нь өнгөрөгч ням гарагт улс орны аюулгүй байдлыг хангахын төлөө Засгийн газраа огцруулж, парламентаа тараасан байна. Засгийн газрын танхимын гишүүд нь парламенттайгаа хамтран ажиллаж чадахгүй байна гэсэн шалтгаанаар огцруулах хүсэлт явуулсны дараагаар эмир нь Кувейтийн ард түмэнд хандан тулгараад байгаа зорилтуудыг шийдэж чаддаг шинэ парламент сонгохыг уриалав. Кувейтийн парламентын дарга нь Засгийн газраас санал болгосон эдийн засгийн өөрчлөлтийн багцыг дэмжиж эсвэл эсэргүүцэх сонирхол парламентад алга гэж мэдэгдэж байсан юм.
Ийнхүү Кувейт нь нэг өдрийн дотор засаглалын хоёр салбаргүй улс болж хувирлаа. Албан ёсны мэдэгдэлд “Кувейт улсын Үндсэн хуулийн 107 дугаар зүйлийн дагуу, бүс нутагт бүрдээд байгаа нөхцөл байдал, болж байгаа үйл явдал ба аюулгүй байдалд тулгарсан асуудлыг тооцон үзээд энэхүү шийдвэрийг гаргалаа” гэж дурджээ.
Татан буугдсан парламентын дарга асан Марзук аль – Ганим нь эмир ард түмэндээ хандан хүсэл зоригоо илэрхийлэн сонголт хийхийг уриалсан явдал Кувейт улсад ардчилал маш өндөр түвшинд байгааг харуулсан хэрэг болсон тухай мэдэгдсэн байна.
