Сурах бичигтэй холбоотой элдвийн асуудлаас болж байнга л шахуу бангадуулдаг байсан БСШУЯ-ныхан энэ жил магтаал сонсохоор ажиллаж буй. 2012-2013 оны хичээлийн жилд үзэх сурах бичгүүдийг эхнээс нь хэвлүүлж дуусгаад аймаг, нийслэлийн Боловсрол, соёлын газруудад хүлээлгэж өгөөд байгаа юм. Үлдсэн сурах бичгүүдийг ирэх сард түгээж дуусгана гэсэн амлалт өгөөд байгаа яамны холбогдох мэргэжилтнүүд нь саяхан сурах бичгийг хэвлэн түгээх гэрээ хийсэн “Адмон”, “Битпресс”, “Содпресс”, “Ном хур”, “Соёмбо принтинг”, “Би Си Ай”, “Экимто” ХХК-иар зочилж сурах бичиг хэвлэх үйл явцтай газар дээр нь танилцжээ. Мөн дунд, ахлах ангийн сурах бичгийг зах зээлд борлуулах зөвшөөрлийг хэвлэлийн газруудтай гэрээ байгуулан олгож 2012-2013 оны хичээлийн жилд хэрэглэх сурах бичгийг ирэх сараас худалдаанд гаргахаар бэлтгэл ажлаа хангасан байна. Түүгээр ч барахгүй шинээр зохиосон тавдугаар ангийн сурах бичгийг казах хэл рүү орчуулах ажлыг Баян-Өлгий аймгийн Боловсролын хэлтэстэй хамтран эхлүүлсэн аж.
