1999-2015 онд оросын 4,5 сая хүн эх орноо орхин гадаадад дүрвэн  гарсан гэж ОХУ-ын Статистикийн газар мэдээлжээ. Харин Иргэний санаачилгын хорооны шинжээч Алексей Кудрин болохоор шинэ илтгэлдээ дүрвэгчийн тоо үүнээс хамаагүй их гэж тэмдэглэсэн байна. Үүнийг тэрээр гадаад орнуудын  дүрвэж ирсэн орос иргэдийн тоо гэдгээс хараад хэлж байгаа юм.

Гадаад орнуудын статистикийг харах юм бол зарим оронд 1,5 сая орос хүн амьвдарч байна гэсэн үзүүлэлт байна. Гэтэл энд хууль бусаар оршин суугчид, ирж очиж байгаа “хоёр нутагтан” орохгүй байгаа шүү дээ.
“Статистикийн газрын мэдээллийг дор хаяж 3-4 дахин өсгөж харах хэрэгтэй. Немцийн статистик мэдээг үзвэл Оросоос 97 мянган хүн цагаачилж ирсэн гэсэн байна. Гэтэл манай статистикийнхан болохоор германд 16,3 мянган хүн гарсан гэж мэдээлж байна” хэмээн  “Оросоос ХХ зууны сүүлч, ХХI  зууны эхэн үед дүрвэгсэд” илтгэлийг зохиогч Александр Гребенюк хэлж байна.

Ингэж авч үзвэл Оросоос лавтай 13-18 сая хүн дүрвэж гарсан болж байна.

2015 онд явуулсан нэг санал асуулгын үеэр оролцогсдын 8-23 хувь нь Оросоос явахад бэлэн байна гэж хариулж байжээ.
Ийм ч учраас ОХУ-ын Статистикийн газрын 4,5 сая хүн гадаадад гарсан гэдгийг шинжээчид мөсөн уулын зөвхөн оргил төдий зүйл, гадаадын статистикийн мэдээг харах хэрэгтэй гэж байгаа юм.

Дахиад л Германы жишээ. Оросын статистикийн газар 2013 онд герман руу 3979 хүн дүрвэж гарсан гэж байхад германы тал оросын 33233 хүн манайд ирж амьдарсан гэж байгаа юм.

Эдийн засгийн ухааны доктор Ольга Воробьева сүүлийн таван жилд цагаачлан одож байгаа хүмүүсийн дотор томоохон бизнесмэн, улстөрийн элитүүд олширч байгааг тэмдэглэж байна. Тэд сайн сайхан амьдралын төлөө гадаад руу хөрөнгөө төдийгүй хүүхдүүдээ гаргаж байна. “Тэд хойч үеэ өөр орнуудад өсгөж, тэнд амьдруулж байгаа нь түгшүүрийн дохио шүү” гэж Воробьева хэлж байна.

Сүүлийн таван жилд гэхэд  жил бүр 120 орчим мянган хүн Оросыг орхин явж байна, Ингээд үзвэл 2011 оноос хойш 500-600 мянган хүн гадаад руу дүрвэжээ гэж Гербенюк хэлжээ.

Гадаад руу  дүрвэн гардаг үндсэн шалтгаан нь хувийн гэр бүлийн шинжтэй, материаллаг баялгийн хуварилалт, нийгмийн статтус, эдийн засгийн аюулгүй байдал зэрэгт   сэтгэл дундуур байгаагаас болж байна гэж Статистикийн газрын мэдээлэлд тэмдэглэсэн байна. Бизнес эрхлэхэд эдийн засгийн нөхцөл байдал тогтворгүй, эдийн засаг дахь эрсдэл их, эдийн засагт эрүүгийн үйл ажиллагаа газар авсан зэрэг ч нөлөөлж байгаа. Хүмүүст, ялангуяа бизнесмэнүүдэд санхүү зээлийн бодлого,  төрийн болон хууль сахиулах байгууллагын хүнд суртал, авлига, хөрөнгө оруулалтад эрсдэл их байгаа нь тэднийг гадаад руу дүрвэхэд нөлөөлж байгаа гэсэн байна.