Б.БАДРАЛ
Сири ба Ирак, Афганистаны цагаачидтай холбоотой асуудал Германд тун хүнд болоод байгаа. Эдгээр улсын гаралтай цагаачид гол төлөв улс төрийн орогнол хүсч ханддаг. Сүүлийн үед Германы цагаачлалын алба ийм орогнол хүсэгчдэд бүгдэд нь шахуу татгалзсан хариу өгдөг болсон. Орогнол хүссэн цагаачдын дотроос хамгийн олон татгалзсан хариу авсан хүмүүс нь Туркээс ирэгсэд, удаах байранд Косовогийн иргэд, гуравт нь сербчүүд орсон байна. Одоогоор улс төрийн орогнол хүсээд татгалзсан хариу авсан хагас сая гаруй хүн Германд амьдарч байна. 2016 оны зургаадугаар сарын байдлаар тус улсад орогнол олгохгүй гэсэн хариу авсан ч гэлээ Германыг орхиж явалгүй амьдарч байгаа хүний тоо 549 мянга 209-д хүрсэн гэдгийг ХБНГУ-ын Засгийн газраас мэдэгдсэн тухай Bild сонинд бичжээ. Засгийн газрын мэдээллээс үзвэл орогнол үзүүлэхгүй гэсэн гадаад иргэдийн дотор Туркээс ирсэн хүмүүс 77600 байгаа нь хамгийн өндөр үзүүлэлт. Дараа нь Косовогийн 68549 –н цагаач, гуравт нь Сербийн 50817 цагаач орсон байна. Үүнтэй зэрэгцээд орогнол үзүүлэхгүй гэсэн хариу авсан 406 мянга 065 хүн Германд зургаа ба түүнээс дээш жил амьдарч байгаа.
Мөн албадан гаргах хугацааг түр хойшлуулсан / Duldung / гэсэн хариу авсан 168 мянга 2012 хүн Германд байна. Тэдний 100 мянга орчим нь орогнол үзүүлэхгүй гэсэн хариу авсан бол 37020 хүн нь гадаад паспорт байхгүйн улмаас ХБНГУ-ын нутагт түр хугацаагаар байх зөвшөөрөлтэй.
Сая ХБНГУ-ын Засгийн газар нь 215 мянган хүнийг албадан гаргах шийдвэр гаргасан ч шийдвэрийг гүйцэтгэж эхлэх хугацаа янз бүрийн шалтгааны улмаас хойшилсоор байгаа аж. Бундестаг дахь эрх баригч эвслийн орлогч дарга Ханс-Петер Фридрихийн хэлж байгаагаар албадан гаргах явцыг зохицуулдаг хууль зүйд шинэчлэл хийх шаардлагатай болсон. Тэрээр “Татгалзах хариу авсан хүмүүст төрийг мэхлээд явахыг нь зөвшөөрч байгаа этгээд нь төр улсдаа итгэх иргэдийн итгэлийг баллаж байгаа юм” гэж онцолжээ.
