Улаанбаатар банкны шилэн барилгын үзэсгэлэнгийн танхимд Ерөнхий боловсролын дунд сургууль төгссөн хүүхдүүдэд зориулсан их, дээд сургуулиудын үзэсгэлэн өчигдөр гарав. Үзэсгэлэнгийн үеэр сонирхсон сургуульдаа шууд бүртгүүлэх боломжтой байлаа. Мөн дотоодын сургуулиудаас гадна Америк, Хятад, ОХУ, Австрали зэрэг орны их, дээд сургуулийн төлөөлөн танилцуулгаа хийж байсан юм.
Үзэсгэлэнг сонирхож буй хүүхдүүдийн олонхи нь уул уурхай, гадаад харилцаа, хэлний чиглэлийн мэргэжил сонирхож байгаа харагдсан. Сургуулиудын босго оноо 400-550-ийн хооронд хэлбэлзэж байна билээ. Зарим дээд сургууль анги дүүргэлтийнхээ тоог гүйцээхийн тулд элсэлтийн ерөнхий шалгалтын оноо нь босго оноонд нь хүрэхгүй байсан ч элсүүлж байв.
Үзэсгэлэнгийн үеэр зарим хүүхдийн сэтгэгдлийг сонссон юм.
Б.Алтанцэцэг: Орост сурах төлөвлөгөөтэй байгаа
/Монгол-Оросын хамтарсан lll сургуулийн төгсөгч/
-Ямар чиглэлээр цаашид сурах хүсэлтэй байна вэ. Мэргэжлээ сонгосон уу?
-Би Орос руу явж геологийн чиглэлээр сурах төлөвлөгөөтэй байгаа.
-Энэ үзэсгэлэнгээс хүссэн сургуулиа олж чадав уу?
-Ерөнхийдөө сургуулиа аль хэдийнэ бодчихсон байсан л даа. Өөр ямар боломж байна вэ гэдгийг харахаар үзэсгэлэнд ирсэн юм. Төлбөрийн хувьд ойролцоо байдаг юм байна.
-Жилийн төлбөр нь хэд орчим болж байх юм?
-Эхний жилд хэлний бэлтгэлд суувал 700-1000 ам.доллар орчим болж байсан. Гэхдээ хэлний бэлтгэлд суух шаардлагагүй гэж бодож байгаа. Шууд мэргэжлээрээ сураад эхэлбэл 900-1500 орчим ам.доллар болох юм. ОХУ-д сурах нь зарим орныг бодоход өртөг багатай санагдсан.
А.Амармэнд: Жүжигчин эсвэл IT инженер болно
/Нийслэлиийн 67 дугаар сургуулийн төгсөгч/
-Ямар мэргэжлээр сурах гэж байна. Сургуулиа сонгочихсон уу?
-Жүжигчин болъё гэж бодоод Кино урлагийн дээд сургуульд бүртгүүлчихлээ.
-Уран чадварын шалгалт өгдөг биз дээ. Тэр шалгалт нь хэзээ гэж байна?
-Долдугаар сарын 5-10-нд уран чадварын шалгалттай гэсэн.
-Энэ жилийн сургалтын төлбөр нь батлагдсан гэнэ үү?
-Яг батлагдаж гараагүй байна билээ. Гэхдээ мэргэжлээсээ хамаараад 980-985 мянган төгрөгийн хооронд байна гэсэн.
-Хэрэв жүжигчний ангид орж чадахгүй бол өөр бодсон юм байгаа л байх?
-Монголын үндэсний дээд сургуулийн компьютер программ хангамжийн ангид бүртгүүлчихсэн. IT инженер болно доо.
Үзэсгэлэнд оролцож байгаа сургуулиудын төлбөр 800 мянгаас сая 200 мянгын хооронд байв. Сургуулиуд “Сургалтын төрийн сан”-гийн тэтгэлгүүдээс гадна төлбөрөө хөнгөвчлөх олон боломжийг элсэгчдэдээ санал болгож байна билээ.
Жишээ нь, дөрвөн улирал дараалан “А” дүнтэй суралцвал сургалтын төлбөрийн 40-50 хувь, ар гэрийн гачигдалтай ч гэсэн мэргэжлээрээ суралцах хүсэл эрмэлзэлтэй оюутнуудад захирлын нэрэмжит тэтгэлэг, ерөнхий боловсролын сургуульд суралцах хугацаандаа гаргаж байсан амжилтуудаас нь хамаараад 20-40 хувийн зэрэг хөнгөлөлтөд хамрагдаж болох аж.
