Монгол Улсын Засгийн газрын тогтоолоор Улаанбаатар хотноо энэ сарын 18-25 нд Азийн Оюутны аварга шалгаруулах эрэгтэй сагсан бөмбөгийн VI тэмцээнийг зохион явуулахаар болсон. Ази тивийн оюутны спортын холбооны 2016 оны тэмцээний хуваарийн дагуу явагдах Азийн оюутны аварга шалгаруулах эрэгтэй сагсан бөмбөгийн зургаадугаар тэмцээнд БНСУ, БНХАУ, Макао, Монгол, Казахстан, Тайвань, Хонгконг гэсэн орны баг тамирчин орж өрсөлдөх юм. Багууд хоёр хэсэгт хуваагдан тоглохдоо “А” хэсэгт дөрөв, “В” хэсэгт гурван баг орно. Тэмцээний сугалаа өнөөдөр Спортын төв ордонд явагдахаар болжээ. Тэмцээний “А” хэсгийг талбайн эзэн Монголын баг толгойлох бол “В” хэсгийг өнгөрсөн тэмцээний аварга БНХАУ-ын баг толгойлно. Хэсэгтээ тойргоор тоглон хэсэг бүрээс эхний хоёр байранд орсон баг цаашид медалийн төлөө хасагдах журмаар тэмцээн явагдахаар болсон юм. Харин тэмцээнд 17-25 насны оюутан тамирчид оролцоно.
Монголын оюутны эрэгтэй шигшээ баг тус тэмцээнд 2006 оноос эхлэн тасралтгүй оролцон 2010, 2012 оны тэмцээнүүдээс хүрэл медаль хүртэн амжилттай оролцож байсан юм. Мөн Азийн оюутны аварга шалгаруулах 3х3 тэмцээнд 2015 онд оролцон мөнгөн медаль хүртэж байсан Ази тивийн шилдэг багуудын нэг гэдгээ батлан харуулж байсан билээ.
