Нийслэлийн Боловсролын газар, Нийслэлийн Хөдөлмөрийн газар болон “Улаанбаатар смарт карт” ХХК хамтран өнөөдөр оюутнуудын хөнгөлттэй зорчих цахим төлбөрийн картын тухай мэдээлэл хийлээ.
Нийслэлийн Боловсролын газрын хуулийн зөвлөх Ц.Ууганбаяр хэлэхдээ, “2016-2017 оны хичээлийн жилд НИТХ-аар баталсан “Их, дээд сургууль, коллеж, МСҮТ-ийн сурагч оюутанд нийтийн тээврийн цахим төлбөрийн карт олгох, цэнэглэх, ашиглахад баримтлах журмын дагуу хөнгөлөлттэй зорчих эрх бүхий оюутанд цахим төлбөрийн картыг олгоно. Шинээр захиалах болон сунгалт хийлгэх хүсэлтийг оюутнуудаас энэ сарын 06-ныг хүртэл сургуулиудад хүлээн авч, 12-18-ны өдрүүдэд тухай сургуулиар дамжуулан тараах юм” гэв.
Шинээр хөнгөлөлттэй зорчих карт авах эрх бүхий оюутан өөрийн сургуульдаа хандан картаа захиалах юм. Сургуулиуд төрийн байгууллагаас тогтоосон хяналтын тоонд багтаан шинээр карт авах оюутнуудын мэдээллийг хянаж баталгаажуулан ирүүлснийг үндэслэн их, дээд сургуулиудад Нийслэлийн Боловсролын газар, МСҮТ, коллежиудад Нийслэлийн Хөдөлмөрийн газар шинээр олгох юм.
Өнгөрсөн хичээлийн жилд нийтийн тээврээр зорчих цахим төлбөрийн карт авсан 2016-2017 оны хичээлийн жилд үргэлжлүүлэн ашиглах нөхцлийг хангасан оюутнууд картаа сунгуулан ашиглана. Цуглуулсан картыг жагсаалтаар баталгаажуулан их, дээд сургуулиуд Улаанбаатар смарт компанид, МСҮТ, коллежиуд Нийслэлийн Хөдөлмөрийн газарт хандан сунгалтаа хийлгэх юм.
Цахим төлбөрийн карт шинээр авах хураамж 3600, сунгалт хийлгэх бол 1000 төгрөгийн үнэтэй аж.
