Аюулгүй байдлыг сайтар чангатгасан боловч “Рио-2016” зуны Олимпын наадам эхлэхээс өмнө болон Олимпын үеэр Бразилд гадаадын иргэдийг онилсон гэмт хэрэг цөөнгүй гарчээ.
Бразилын цагдаа нарын мэдэгдсэнээр, наймдугаар сарын 14-нийг хүртэлх 18 хоногийн хугацаанд тамирчдын тосгонд хулгай дээрмийн 73 тохиолдол бүртгэгдсэн байна.
Тухайлбал, Японы иргэдийг дээрэмдсэн хоёр, тэдний эд зүйлс хулгайд алдагдсан 18 тохиолдол бүртгэгджээ.
Наймдугаар сарын 6-нд Маракана дүүрэгт Японы хоёр иргэнд буу тулган хэтэвч болон гар утсыг нь дээрэмдсэн байна.
Мөн өдөр Ипанема наран шарлагийн газрын ойролцоо Португалын Боловсролын сайдыг хутгаар зэвсэглэсэн хоёр этгээд сүрдүүлэн мөнгө болон гар утсыг нь дээрэмджээ.
Олимп эхлэхээс өмнө аюулгүй байдал муу байна гэж шүүмжилж байсантай холбогдуулан урьд урьдын Олимпынхоос олон цэрэг, цагдаа нарыг эргүүл хамгаалалтад гаргасан боловч гэмт хэрэг гарсан олон тохиолдол бүртгэгдсэн байна.
