Монгол Улсын Засгийн газрын 2012-2016 оны мөрийн хөтөлбөрт тусгасан “Шинэ бүтээн байгуулалт” хугацааны дэд хөтөлбөрт иргэдийг хямд өртөгтэй, чанартай орон сууцаар хангахыг зорилго болгосон. Нийслэлд Төрийн орон сууцны корпорацын “Буянт-Ухаа 1”,  “Буянт-Ухаа 2” хороолол, аймаг бүрт 1000 айлын орон сууц хөтөлбөр амжилттай хэрэгжиж буй. Төрийн энэхүү бодлогын хүрээнд өдгөө 5016 айл орон сууцанд ороод байгаа юм. Нисэхийн дэнж дээр дахин нэг том хороолол сүндэрлэхээр бэлтгэл ажлаа эхэлжээ.

Үндэсний бүтээн байгуулалтын корпорац хэмээн дотоодын таван компани нэгдэл болж 2013 онд анх “Буянт-Ухаа 1” хорооллыг барьсан. Монгол инженерүүд, Монгол барилгачдын гараар боссон “Буянт-Ухаа 1” хороололд есөн давхар 28 ширхэг орон сууц, 120 хүүхдийн цэцэрлэг, үйлчилгээний төв, хүүхдийн тоглоомын талбай, автомашины гадна болон дулаан зогсоол зэргийг иж бүрнээр нь бүтээн байгуулсан юм. Барилгын ажилд 700 гаруй мэргэжлийн ажиллагсад, гадна болон дотор засалд 1000 гаруй мэргэжлийн ажиллагсад оролцсон.
“Буянт-Ухаа 2” хорооллын эхний хэсгийн есөн давхар бүхий 30 ширхэг барилга буюу 1620 айлын орон сууц, 240 хүүхдийн цэцэрлэгийн хамт ашиглалтад оруулж 2015 он төгсгөлд хүлээн авсан билээ. “Буянт-Ухаа 1” хороолол дээрх таван компанийн 3000 гаруй инеженер, техникийн ажилчин, ажилтнуудын хөдөлмөрөөр боссон юм. Ахмад настан, хөгжлийн бэрхшээлтэй тэргэнцэртэй иргэдэд зориулсан олон улсын стандартад нийцсэн зам, гарц, тэмдэг, тэмдэглэлээ хийж, хаалга, цахилгааны шатыг шийдсэн онцлогтой.

Анх төлөвлөхдөө 6500 айлын орон сууц барихаар тооцсоны дагуу тус “Буянт-Ухаа 2” хорооллын хоёрдугаар ээлжийн бүтээн байгуулалтаар 3900 айлын орон сууц, үйлчилгээний төв зургаа, цэцэрлэг гурав, сургууль хоёр, кино театр, спорт цогцолбор зэргийг барьж, байгуулах юм.
Энэ удаагийн бүтээн байгуулалтыг “Нью Глобал Вейз” компани удирдаж, дотоодын 70 орчим аж ахуйн нэгжийн 5000 гаруй инженер, техникийн болон барилгын мэргэжлийн ажилтнууд оролцохоор болсон. Үүнээс үзэхэд урьд өмнөх хоёр удаагийн бүтээн байгуулалтаас нь өргөн хүрээг хамарсан ажил болох нь харагдаж байна. Дотоодын компаниуд дотооддоо үйлдвэрлэсэн барилгын материалыг ашиглан ажлаа гүйцэтгэх юм. 2018 онд багтаан хүлээлгэн өгөх төлөвлөгөөтэй энэхүү бүтээн байгуулалтын шав тавих ёслолд Нийслэлийн Засаг дарга Э.Бат-Үүл, УИХ-ын гишүүн Г.Батхүү, Л.Болд, УИХ-ын даргын ипотек барилгын асуудал хариуцсан зөвлөх Г.Байгалмаа, ТОСК-ын захирал А.Гантулга нар оролцлоо.
Төр хувийн хэвшлийн түншлэлийн гэрээгээр гүйцэтгэхээр болсон “Буянт-Ухаа 2” хорооллын хоёрдугаар ээлжийн барилгын ажлын хөрөнгө оруулалтыг “Нью Глобал Вейз” компани 100 хувь шийдэж байгаа аж. Харин 19,32 га газар, зураг төсөл, дэд бүтцийг нь шийдэж өгч буйг “Нью Глобал Вейз” компанийн төслийн удирдагч А.Баттулга хэллээ.
ТОСК-ын захирал А.Гантулга “2014 оны өдийд “Буянт-Ухаа 2” хорооллын барилгын ажил эхэлж байсан. 17 сарын дараа барилгуудаа улсын комисст хүлээлгэн өгч одоо 1764 айл орон сууцандаа ороод байна. Хоёр жилийн өмнөөс л “Буянт-Ухаа 2” хорооллын хоёрдугаар ээлжийн хөрөнгө оруулалт яригдаж эхэлсэн. Энд 12 давхар 60 ширхэг орон сууц, 1250 хүүхдийн 2 сургууль, 240 хүүхдийн 3 цэцэрлэг, спорт цогцолбор, худалдааны төвтэй баригдана” гэж танилцуулсан юм.
Улаанбаатарын хувьд өнгөрсөн дөрвөн жилийн хугацаанд томоохон бүтээн байгуулалт голлон хийсэн Хан-Уул дүүргийн хэмжээнд л гэхэд 5000 гаруй ажлын байр бий болгосныг хотын дарга онцолж байлаа.  
Нийслэлийн Засаг дарга Э.Бат-Үүл “Бүтээн байгуулалтын ажлуудыг нийслэл  бүх талаар нь дэмжиж оролцсон. Албан ёсны бүртгэлээр 216 мянган айл буюу 600 орчим мянган хүн гэр хороололд амьдарч байгаа. Бүртгэлд хамрагдаагүйгээр бол ойролцоогоор 800 мянган хүн орон сууцанд орох шаардлагатай байгаа. Орон сууц бол Улаанбаатарын агаарын, хөрсний бохирдолыг цогцоор нь шийдэх ганц гарц. Бүтээн байгуулалтууд бол дөрвөн жилийн ажлын үр шим. УИХ-ын гишүүд Барилга хот байгуулалтын дэд сайдаар ажиллаж байсан Г.Байгалмаа нийслэлийнхэнтэй маш сайн хамтарч ажилласан. Улаанбаатар хотыг хөгжүүлэх төлөвлөгөөг хуульчилж, УИХ-аар батлууллаа. Ингэснээр бид цахилгаан, ус, дулаан гээд суурь дэд бүтцээ өнгөрсөн жилүүдэд хийж чадлаа” гээд олон барилгачин бүтээн байгуулалтад ажиллаж орлоготой болохоос гадна нийслэлд татвараа төлж, зохих ёсны дэмжлэгээ үзүүлэхийг хүсч буйгаа уламжиллаа. 

Сүүлийн жилүүдэд сэргэж, зөвхөн барилга угсралт гэлтгүй барилын материалын үйлдвэрлэлийг шинэ түвшинд аваачиж, хөгжүүлж буй барилгачдадаа баяр хүргэж, амжилт хүссэн урмыг үг хэлсэн юм. Энэ бол барилгынхаа салбарт үнэнчээр зүтгэж яваа УИХ-ын даргын ипотек барилгын асуудал хариуцсан зөвлөх Г.Байгалмаагийн үг байсан юм.  “Бидний дөрвөн жилийн ажлын үр шимийн  өнөөдөр гарч, дахиад үргэлжилж байна. Энэ их бүтээн байгуулалтыг хийж гүйцэтгэн гар бие оролцсон барилгын салбарынхандаа талархаж байгаагаа илэрхийлье. Барилгын салбарын түүхт 90 жилийн ойтойгоо золгож байгаа. Сүүлийн 20 жилийн бүтээн байгуулалтыг харахад өнгөрсөн дөрвөн жилд дийлэнхийг нь хийсэн нь барилгачид та бүхний нөр их хөдөлмөрийн үр дүн” хэмээн салбарынхандаа хандаж хэлсэн юм.
Монголдоо үйлдвэрлэсэн цемент, арматураар монгол барилгачдын барьсан монгол брэндийн орон сууцны цогц хороолол удахгүй сүндэрлэх нь.