Эдийн засгийн байнгын хорооны хуралдаанаар Австри улсын Засгийн газартай байгуулах Санхүүгийн хамтын ажиллагааны ерөнхий хэлэлцээрийн төслийг хэлэлцэн, дэмжлээ. Өмнө нь буюу 2012 онд манай улс Австритай 40 сая еврогийн санхүүгийн хэлэлцээр байгуулж, зургаан төсөл амжилттай хэрэгжүүлж байсан туршлагатай. Үүнд үндэслэн 40 сая еврогийн шинэ санхүүгийн хамтын ажиллагааны хэлэлцээр байгуулахаар төслийг нь бэлтгээд байгаа юм.
Энэхүү 40 сая еврогийн зээлийн ерөнхий нөхцөл нь хөнгөлөлттэй зээлийн хөнгөлөлтийн түвшинд тавигдах шаардлага хангасан буюу жилийн хүүгүй, 18 жилийн хугацаатай, үндсэн төлбөрөөс таван жилийн дотор чөлөөлөгдөх болзолтой юм. Энэ нь Өрийн удирдлагын тухай хуулиар нэн хөнгөлөлттэй зээлийн ангилалд хамаарч байна. Харин энэ хэлэлцээрийг хоёр жилийн хугацаатай байгуулах бөгөөд энэ хугацаанд хэрэгжүүлэх төлсийг бүрэн тохиролцох ёстой байдаг аж.
Өнөөдрийн байдлаар манай тал Австрийн талд дээд бүтэц, орон нутгийн ус, хог хаягдал, эрүүл мэнд, нийгмийн хамгаалал, төмөр зам, боловсрол гэсэн чиглэлээр хийгдэх төслийг санхүүжүүлэх хүсэлт хүргүүлсэн байгаа юм. Мөн Хүнс, хөдөө аж ахуйн яамны хүсэлтээр хөдөө аж ахуйн салбарыг нэмж оруулах хүсэлтийг Австрийн тал хүлээн авсан байна. Тиймээс дээрх чиглэлийн дагуу зарцуулалтыг тусгаад байгааг Эдийн засгийн байнгын хорооны хуралдааны үеэр танилцууллаа.
