Шинэчлэн батлагдсан Нэмэгдсэн өртгийн албан татварын тухай хууль хэрэгжиж эхэлснээс хойш буюу энэ оны нэгдүгээр сарын 1-нээс хойш цахим төлбөрийн системд бүртгэлтэй аж ахуй нэгжийн тоо 30 гаруй мянгад хүрчээ. Энэ хугацаанд НӨАТ-ын сугалааны 35 сая баримт 34.1 мянган цэгт хэвлэгдэж, 549 сая төгрөгийн шагналын сан бүрдүүлсэн байна. Улмаар цахим төлбөрийн баримтын системд 411 мянган хэрэглэгч бүртгүүлж, сугалаанаас 14470 азтан тодорчээ.
Ерөнхий сайд Ч.Сайханбилэг НӨАТ-ын тухай хуулийн хэрэгжилттэй танилцах явцдаа эхний ээлжинд буцаан олголт хийх техник технологийн шийдлийг гаргаж, системд бүртгүүлсэн 411 мянган иргэний НӨАТ-ын хоёр хувийн буцаалтыг энэ сард багтаан олгохыг үүрэг болгосон. Мөн тэрээр “НӨАТ-ын буцаан олголтыг хамгийн хялбар, ил тод байдлаар хийх систем бий болгох ёстой” гээд хуулийн хэрэгжилттэй холбоотой эргэж буцах зүйл байх ёсгүй хэмээн анхааруулсан билээ.
