Аргентины хөлбөмбөгч Лионель Мессигийн дугаар бүхий гялгар уутан өмсгөлтэй жаалын зураг цахим ертөнцөөр тарж, дэлхий нийт Мессигийн бяцхан фэнийг мэддэг болсон. Тариан талбайн захад, гялгар уутан өмсгөлтэй воллейболын бөмбөгөөр хөлбөмбөг тоглож буй жаалын тухай дуулсан Месси ч Афганистаны хөлбөмбөгийн холбоогоор дамжуулан хүүтэй уулзах хүсэлтээ уламжилсан байна.
Таван настай Муртаза хүүгийн аав тариачин бөгөөд “Аль Жазира”-д өгсөн ярилцлагадаа “Амьдралын боломж тааруу болохоор хүүдээ өмсгөл авч өгч чадахгүй, гэхдээ ингэлээ гээд гялгар уутаар өмсгөл хийж өгч болохгүй гэсэн үг биш” хэмээсэн байна.
Ямартай ч, хөлбөмбөгийн од бяцхан хөгжөөн дэмжигчтэйгээ тун удахгүй уулзах бололтой. Харин Месси Афганистанд очих уу, эсвэл хүү Испани руу аялах уу гэдэг нь асуулт хэвээр үлдлээ. Энэ тухай Муртаза хүү “Би Мессид, хөлбөмбөгт хайртай. Хэзээ нэг өдөр Месситэй уулзаж, түүн шиг нэртэй тоглогч болно гэж боддог” хэмээжээ.
