Улсын аваргаа тодруулаад удаагүй Монголын жүдо бөхийн холбооны шигшээ багийн тамирчид энэ оны анхны олон улсын тэмцээндээ зодоглохоор эх орноосоо мордлоо.

Олон улсын жүдо бөхийн холбоо буюу IJF-ийн календарчилсан төлөвлөгөөний дагуу “Рио-2016” олимпын эрхийн оноо олгох тэмцээн Кубын Гавана хотноо маргааш эхэлж гурав хоног үргэлжилнэ. Тэмцээнд эрэгтэй 253, эмэгтэй 165 нийт 418 жүдоч оролцохоор мэдүүлгээ өгөөд байна. Манай улсаас нийт есөн бөх мордсон. Дасгалжуулагч О.Балжинням, Олон улсын хэмжээний мастер Г.Дашдаваагийн удирдлагад оролцох юм.

Багийн бүрэлдэхүүнд “Аврагч” спорт хорооны тамирчин, залуучуудын ДАШТ-ий хошой мөнгөн медальт Ц.Цогтбаатар эрэгтэйчүүдийн 60 кг-д, “Женко” клубийн тамирчин ОУХМ Г.Одбаяр 73 кг-д, “Хангарьд” спорт хорооны тамирчин, ОУХМ Н.Дагвасүрэн 81 кг-д, мөн клубийн тамирчин О.Ууганбаатар, +100 кг-д “Женко” клубийн тамирчин Б.Тэмүүлэн, ОУХМ Ө.Дүүрэнбаяр нар тус тус хүч үзнэ. Харин эмэгтэйчүүдийн төрөлд “Алдар” спорт хороо, “Женко” клубийн тамирчин ОУХМ А.Цолмон, 52 кг-д, “Женко” клубийн тамирчин П.Лхамдэгд -78 кг-д зодоглох бол +78 кг-ын жинд “Женко” клубийн тамирчин О.Жавзмаа нар хүч үзэхээр Кубыг зорьжээ.