Зүүн Азийн эдийн засаг энэ жил 6.5 хувиар өснө гэж Дэлхийн банк мэдэгдэв. Энэ нь өнгөрсөн жилийнхээс 0.3 хувиар доогуур үзүүлэлт бөгөөд БНХАУ-ын эдийн засгийн өсөлт буурсантай холбоотой юм.
БНХАУ, Зүүн Өмнөд Азийн орнууд болон Номхон далайн арлууд Зүүн Азийн бүс нутагт багтдаг боловч Япон ордоггүй байна. Дэлхийн банкны эдийн засагчид өчигдөр урьдчилсан таамгийг гаргажээ. БНХАУ-ын эдийн засгийн өсөлт буурснаас гадна, Малайз болон Индонезэд эрдэс баялгийн үнэ унасан нь Зүүн Азийн бүс нутгийн эдийн засгийн өсөлт буурах шалтгаан болж байна.
Үүний зэрэгцээ, хувийн хэвшлийн байгууллагуудын найдвартай хөрөнгө оруулалтын ачаар Вьетнамын эдийн засаг өсөх хандлагатай байна гэж эдийн засагчид үзжээ. 2016 онд БНХАУ-ын эдийн засгийн өсөлт буурсан хэвээр байх төлөвтэй байгаагаас болж, Зүүн Азийн бүс нутгийн эдийн засаг өсөлт ирэх жилд мөн буурах хандлагатай байна гэж Дэлхийн банк таамаглажээ.
Бүс нутгийн эдийн засгийн өсөлтийг тогтвортой хадгалахын тулд хувийн хэвшлийн хөрөнгө оруулалтыг нэмэгдүүлэх зохицуулалтын нэмэлт бодлго хэрэгжүүлэхийг албаны хүмүүс уриалсан байна.
