ЭЕШ улс орон даяар зэрэг явагдаж өнөөдөр дууслаа. Энэ удаагийн шалгалтад 43087 шалгуулагч 52 төвд 10 хичээлээр шалгалт өгсөн байгаа. Харамсалтай нь, жил бүр гардаг алдаа дутагдлууд энэ жил ч давтагдав. Шалгалт эхлэхээс цагийн өмнө ирж, арван минутын өмнө суудлаа эзэлсэн байх ёстой талаар Боловсролын үнэлгээний төвөөс удаа дараа сануулсаар байтал хүүхдүүд хоцорсон хэвээр байжээ. Шалгалтаасаа хоцорсон хүүхдүүдийн хувьд ирэх жилийн шалгалтыг хүлээхээс өөр замгүй. Мөн бичиг баримтгүй ирсэн зөрчил нэлээд гарсан байна. Шалгалтын эхний өдөр сануулга өгч шалгалтад нь оруулж байсан ч сүүлийн өдрүүдэд өршөөл үзүүлээгүй байна. Мөн бүрэн дунд боловсролын гэрчилгээгүй хэрнээ шалгалтад орохыг завдсан хэд хэдэн шалгуулагч байсан аж. Тэднийг шалгалтад оруулаагүй байна.