Зуны олимпын гучин нэг дэх наадамд оролцох АНУ-ын сагсан бөмбөгийн шигшээ багийн бүрэлдэхүүн удахгүй тодорно. 
АНУ-ын сагсан бөмбөгийн шигшээ багийн ерөнхий менежер Жерри Коланжело энэ сарын 11-нээс 13-ны өдөр Лас-Вегас хотод бэлтгэл хийх тамирчдын нэрийг зарлалаа. Үүнд НБА-гийн Леброн Жеймс, Дуайт Ховард тэргүүтэй шилдэг гучин дөрвөн сагсан бөмбөгч дуудагдсан бөгөөд өнгөрсөн улирлын аварга “Голден Стейт Уориорс" багаас Дреймонд Грин,Степэн Карри, Клей Томпсон, Харрисон Барнс нар багтжээ. Бэлтгэлийн дараа шилдгүүдээс Рио-де-Жанейрогийн олимпт өрсөлдөх багийг бүрдүүлэх юм. АНУ-ын сагсан бөмбөгийн эрэгтэйчүүдийн үндэсний шигшээ баг нь олимпт арван зургаан удаа оролцсоноос арван гурав түрүүлсэн бахархам амжилттай ба ирэх зун ч хүчтэй өрсөлдөгч хэвээр байх биз.
