ОХУ-ын Хакаст зуслангаас буцаж явсан 300 орчим хүүхдийн амийг аврахын тулд өөрөө автоын байцаагч  аюулыг биеэрээ хаахад хүрсэн байна. Өнгөрсөн 25-ны өдөр Абакан-Ак-Доурокын замаар 300 орчим хүүхэд тээвэрлэж явсан цувааны өмнөөс урсгал сөрөн хурдтай ирж байсан машиныг Замын цагдаагийн эргүүл Александр Косолапов өөрийнхөө машинаар хааж зогсоожээ.
“Хүүхдүүдийн автобусыг аймшигт осолд орохоос сэргийлж байцаагч Александр Косолапов нөхцөл байдлыг цаг алдалгүй  үнэлээд аргагүйн эрхэнд өөрийгөө золиосонд гаргаж, урсгал сөрөн асар хурдтай ирж байгаа машиныг өөрийн машинаар мөргөж аюулыг зайлуулж чадсан” гэж Хакасын Дотоод яамны мэдээнд дурджээ.

Одоо эмнэлэгт байгаа цагдаагийн байцаагчийн амийг аврахын тулд эмч нар чадах хэрээрээ ажиллаж байгаа гэнэ. Өмнөөс нь ирж байсан машины жолооч, дөрвөн зорчигч бас эмнэлэгт байгаа юм байна.
“Цагдаагийн ажилтан олон тооны бэртэл авсан. Машиныг нь бол сэргээн засварлах ямар ч арга байхгүй. Дүрэм зөрчсөн жолоочийн кабинд бас 10 настай хүүхэд явж байсан. Автобусаар зорчиж явсан хүүхдүүдээс бэртэж гэмтээгүй” гэж яамны мэдээнд бас бичжээ.
       
Автобусандаар зорчиж явсан хүүхдүүдийн эцэг эхчүүдээс талархлын хэдэн арван захидал ирж цагдаагийн ажилтныг түргэн эдгэрэхийг ерөөж байна.
“Энэ цуваанд миний ач охин явж байсан. Энэ олон хүүхдийн амийг аварсан энэ хүнд баярлалаа. Өөрийнхөө машинд яваа хүүхдийн ч, өмнөөс нь ирж байсан хүүхдүүдийн ч амийг хайрладаггүй тэр жолоочид зохих шийтгэлийг нь оногдуулах хэрэгтэй” гэж нэг эмээ бичжээ.