Засгийн газрын байгууллагуудын компьютерийн сүлжээнд нэвтэрч, төрийн болон арилжааны нууц материалуудыг хулгайлдаг хакеруудыг Орос, Хятад, БНАСАУ, Иран улсууд санхүүжүүлж байна гэж АНУ-ын ерөнхийлөгчид нэрээ дэвшүүлээд байгаа Хилари Клинтон буруутгасан байна.
Тэрээр “Энэ бол зөвхөн хятад биш. Орос, Иран, БНАСАУ-ын засгийн газрууд хакеруудыг шууд болон дам аргаар санхүүжүүлж байгааг бид мэдэж байгаа” гээд кибер халдлагын томоохон террорист байгууллагууд цаашид ч ийм үйлдэл хийх байх гэж сэтгэл эмзэглэж байгаагаа илэрхийлснийг рейтер агентлаг дамжуулжээ.
Тавдугаар сард АНУ-ын холбооны татварын газрын дотоод орлогын алба Оросын зүгээс кибер халдлагад өртөж 104 мянга орчим хүний мэдээлэл алдсаныг CNN мэдээлж байсан юм.
Үүний өмнө дөрөвдүгээр сард ч оросын хакерууд АНУ-ын ерөнхийлөгч Барак Обамагийн электрон шууданд нэвтэрч Цагаан ордны ажилтнуудын харилцсан бичвэрүүдийг авсан тохиолдол илэрч байжээ.
