Оросын Засгийн газар хамгаалж чадалгүй түймэрт шатаачихсан Сибирийн газар нутагт хятадын фермерүүдийг суурьшуулж, оронд нь хятадын Өвөр монгол дахь Инкоу хотод хакас иргэдийг амьдруулъя хэмээн БНХАУ-ын Төрийн зөвлөлийн ерөнхий сайд Ли Кэцян, ОХУ-ын талд  албан ёсоор санал тавьсан байна.
Хакасын нутагт ирсэн хятадууд мал маллаж, бизнес эрхлэх бол орос иргэд Ляонин муж дахь бүхэл бүтэн хотод амар тайван амьдарч болно гэнэ. Тэнд нь хакас иргэдэд бүү хэл Приморийн хязгаарын үерт нэрвэгдсэн хүмүүс амьдарч хүрэлцэх байшин орон сууц хангалттай байгаа юм байна.
Хятадын Төрийн зөвлөлийн ерөнхий сайд Ли Кэцян “гал түймэрт автан гамшигт нэрвэгдсэн оросын ахан дүүс Инкоу хотод шилжин суурьшиж болох юм” гэж мэдэгдсэн байна. Энэ хүсэлтийг хүлээн авбал үерт автаад байгаа Приморийн хязгаарын иргэдийг ч хүлээн авч болно гэжээ. Энд орон сууц, барилга бүрэн хангалттай байгаа гэж түүний хэлснийг “Хакасия” мэдээллийн агентлаг дамжуулсан байна.
Харин оронд нь түймэрт өртсөн Хакасын нутгийг хятадууд  25 жилээр түрээсэлж хятадын фермерүүд ашиглан бүтээгдхүүнээ оросын зах зээлд гаргах гэнэ.
Орос иргэдийг нүүлгэн суурьшуулах гээд байгаа Инкоу хот нь эрхэм Ли Кэцяны өөрийнх нь бий болгосон төсөл. Тэрээр Бүх Хятадын ардын төлөөлөгчдийн хурлаас Төрийн зөвлөлийн ерөнхий сайдын албанд  сонгогдохынхоо өмнө  хэд хэдэн мужийн намын хороон даргаар ажиллаж байсны нэг нь Ляонин муж. Энэ түшмэл энд ажиллах үедээ мужийн хуучин аж үйлдвэрлэлийн баазыг сэргээн босгож орон сууцны том хөтөлбөрүүд хэрэгжүүлсний нэг нь Инкоу хот.
Хаврын эхнээс Хакаст их хэмжээний түймэр дэгдэн 40 суурин газрын 1700 байшин түймэрт өртөж шатсан. Түймэрт өртөн түлэгдэж шархадсан 34 хүн нас барж, 1400 хүн эмнэлгийн тусламж авч нэлээд хэсэг нь өнөө ч эмнэлэгт хэвтэн эмчлүүлж байна. Түймрийн гамшгийн нийт хохирлыг эрх баригчид долоон тэрбум рубль гэж тооцож байгаа юм. ОХУ-ын Засгийн газрын мэдээлснээр бол энд тавдугаар сарын 15-наас эхлэх  шинэ барилга барих ажилд Засгийн газар 2,8 тэрбум рубль хуваарилжээ.