Оросын ерөнхийлөгч Владимир Путины түрэмгий бодлогоос болж ОХУ-ыг задруулж мэдэх цэргийн гурван ч мөргөлдөөн хүлээж байж магадгүй хэмээн АНУ-ын Төрийн департаментад Зөвлөлт холбоот улсын асуудал хариуцаж байсан  мэргэжилтэн, Жорж Мейсоны их сургуулийн профессор Марк Кац “Голос Америк”-т мэдэгдсэн байна. Эрдэмтэн анхны Хүйтэн дайн нь ЗХУ-ыг тараахад хүргэсэн гэдгийг сануулаад Путины эхлүүлсэн хүйтэн дайн нь олон улсын бодлогыг бүрэн өөрчилж Оросыг задрахад  хүргэнэ гэжээ.  Кацын үгээр бол Путины үйл ажиллагаа нь Орост өөрт нь муугаар нөлөөлж байгааг тэр ойлгохгүй байна гэнэ.
“Путины мэдэгдлийг сонсоод үз дээ. Барууныхан бол түүний хувьд сул дорой, тэгээд Орост аймшигтай аюул заналхийлж байна гэдэг. Энэ хоёр санаа өөр зуураа зөрчилдөж байна. Энэ бүхнээс үзэхэд Путины үгнээс  бодит байдал биш харин ч Оросын задраах шинэ нөхцөл байдал, шинэ гамшиг үнэртэж байна” гэж эрдэмтэн хэлжээ.
“Путины өмнө нэгэн зэрэг гурван ч зэвсэгт мөргөлдөөн байж магадгүй. Энэ бол Украин, Умард Кавказ, Төв Ази. Нөхцөл байдал хэдий л төвөгтэй болно, төдий чинээ суудал ганхана. Оросод өнөөдөр өөрийн цагаа хүлээж байгаа хүчин байсаар байгаа. Хүмүүс, маш олон хүн ардчиллыг хүсч байна” гэсэн байна.
ОХУ өөрөө Европт тийм бодлого явуулж байгаа юм. Өөрийнхөө фашист гэж нэрлээд байгаа АНУ, Европын холбооны эсрэг хөдөлгөөнийхөнд Москва мөнгө, дэмжлэг өгсөөр байна. Профессор Кац энэ дэмжлэг нь Москва өөрийнхөө дайсныг  тэжээж байгаа хэрэг гэжээ.
“Энэ бол Сталин өнгөрсөн зууны 30-аад онд немцийн коммунистууд гээд нацистуудтай хамтран ажиллаж байсантай яг адил. Сталин болохоор нацистууд Зөвлөлт холбоот улсын ашиг сонирхлын төлөө ажиллана гэж бодсон. Гэтэл энэ нь юугаар төгссөнийг бид мэднэ. Тодорхой хүмүүс засгийн эрхэнд гараад ирэхээрээ Москвагийн хүсээд байсан шиг биеэ авч явахгүй л болов уу. Одоо тэд барууны эсрэг байгаа ч үнэн хэрэгтээ мөнгөний төлөө л Путинтэй ойртож байгаа шүү дээ” гэж Кац тэмдэглэжээ.
Ашиггүй бол Оростой хэн ч нөхөрлөхийг хүсэхгүй. Египет гэхэд л зэвсэг хүсч байна. Латин Америк болохоор мөн л “арьсаа хамгаалсан” ашиг сонирхолтой. Бразиль, Хятад, Орос, Энэтхэг, Өмнөд Африкийг багтаасан БРИКС гэхэд  бас л АНУ, Европын эсрэг байж чадахгүй гэдэгт шинжээч итгэлтэй байна.
“БРИКС-ийн хоёр том гүрэн Энэтхэг, Хятад хоёр бие биендээ дургүй. Энэтхэг болохоор Москваг Хятадтай адилд тооцож байгаа. Гэтэл Бээжин, Орос  хоёр түншүүд болохоор Энэтхэгт Москва ашиггүй гэсэн үг. БРИКС-ийн энэ бүх яриа хэлэлцээр зүгээр үзүүлэн” гэж Кац хэлжээ.
Оросын энэ заль мэх, эрээгүй байдал нь бүхнийг өөрийнхөө эсрэг болгож байна. Кац энэ бүхнээс үүдээд Путины жолоодож яваа Орос төрийн бодитой хямралд ороод ирэхэд Москвагийн талд  хэн ч үлдэхгүй гэж байна.
“Путин болохоор Украиныг тараачихна, харин Орост хэзээ ч ийм явдал тохиохгүй гэж гэнэнээр бодож байна. Миний бодлоор бол тийм биш. Орос Умард Кавказ, Татарстанаа алдаж магадгүй. Украинаас ялгаатай нь тэр цагт Орост хэн ч туслахгүй” гэж эрдэмтэн хэлж байна.
“Орос хүндэтгэл хайж байгаа, гэхдээ хүндэтгэл гэдэг аймшигтай ижил. Тэд үнэхээр хөршүүдээ НАТО-гоос хамгаалахыг хүсээд байгаа юм бол тэдэнтэй ойр дотно харилцах ёстой. Гэтэл оросуудад  ийм бодол алга. Тэд өөрсдийгөө яг л дээрэмчин, өөр юу ч чадахгүй юм шиг авч явж байна. Тэд цаашид том гүрэн байж чадахгүй гэдгээ ойлгохгүй байгаа болохоор хэн нэгнээс айдас, бас хэн нэгнээс инээд хайж байгаа юм. Өөрсдөд нь юу хамгийн сайн бэ гэдгийг оросууд зүгээр л мэдэхгүй байна шүү дээ” гэж Кац дүгнэжээ хэмээн укроп.org сайтад бичжээ.