Өдөр ирэх тусам дотоодын аюулгүй байдал нь хурцдаж, иргэний дайны ирмэг дээр ирээд байгаа Йемен улсын хил орчимд Саудын Арабын арми хүнд зэвсэг техник төвлөрүүлж, цэргийн хүчээ нэмэгдүүлж байна. Үүнээс үзвэл тус улс Йеменд агаарын цохилт өгч ч болзошгүй гэж олон улс таамаглаж байгаа юм.
Йемений хууль ёсны Засгийн газрын зүгээс Булангийн орнуудад хандан интервенц хийхийг хүсээд удаагүй байгаа. Түүнчлэн НҮБ-аас ч тодорхой арга хэмжээ авахыг хүссэн. Гэхдээ АНУ тэргүүтэй барууны орнууд Йемений зөрчил мөргөлдөөнд гар дүрэх гэж яарахгүй байгаа юм. Саудын Арабыг ч Йемений асуудалд оролцсоноор байдлыг бүр хурцатгаж магадгүй хэмээн болгоомжилж буй.
Йемений хойд хэсгээс гаралтай, салан тусгаарлах үзэлтэй Хоутхи хэт даврагсдын бүлэглэл өнгөрсөн амралтын өдрүүдэд хяналтад авсан газар нутгаа улам тэлсээр, Ерөнхийлөгч Хадигийн тэргүүлж буй Йемений арми, цэрэг зэвсгийн хүч төвлөрсөн өмнөд хэсгийн хотод тулж ирээд байгаа юм.
