Осака хотноо болж буй мэргэжлийн сүмогийн хаврын тэмцээн Харү башёгийн ес дэх өдрийн барилдааны дараа Их аварга Хакүхо М.Даваажаргал ганцаараа 9 даваатай тэмцээнийг хошуучилж байна.
Харин түүний араас нэг унаатай ганц бөх байгаа нь шинэ сэкивакэ Тэрүнофүжи Г.Ган-Эрдэнэ нэхэж явна. Тэрбээр найм дахь өдөр озэки Кисэносатод унасан юм. Харин Их аварга Харүмафүжи Д.Бямбадорж маэгашира Ичиножёо А.Ичинноров, Гүржийн Точиношинто, Японы Тоёонишима нарт унаад байна. Японы гол найдвар болсон озэки Кисэносато, Гоэйдо, Котошёогикү нарын хувьд бүгд зургаан даваа, гурван унаатай башёг үргэлжлүүлж байгаа юм. Үлэмж биет /202 кг/ Ичиножёо А.Ичинноров ёкозүна Харүмафүжи, озэки Кисэносато, Котошёогикү нарыг давсан. Өнгөрсөн сарын башёг 6 даваа, 9 унаатайгаар өндөрлүүлж, сэкивакэ цолоо алдсан Ичиножёо энэ башёд маэгаширагийн нэгээс барилдаж байна. Одоогоор Ичиножёо таван даваа, дөрвөн унаатай явна.
