Британид явуулсан судалгаагаар оффисын ажилтнуудын 30 гаруй хувь нь ажил гэрийн хооронд явах замдаа бараг хагас цагийн ажлаа амжуулдгийг тогтоожээ. Ажилтнууд галт тэрэг, метрогоор явах замдаа ажлын холбогдолтой цахим шуудангаа шалгаж, хариу илгээх, судалгааны материалуудыг уншиж танилцах, баримт бичигт засвар хийх, бусад хамтран ажиллагсад руугаа шаардлагатай файл илгээх зэргээр ширээн дээр суугаад хийвэл хагас цаг зарцуулах ажлыг амжуулдаг гэнэ. Ингэснээр 10 зорчигч тутмын нэг нь ажлын үндсэн цагаас гадна нэмэлтээр 45 минутыг ажилдаа зарцуулдаг болсон байна. Мэдээж тэд ажил гэрийн хооронд явах замдаа амжуулсан ажилдаа цалин хөлс авахгүй учир энэ нь эдийн засагт багагүй үр ашгаа өгч буй тухай тооцоо ч гарчээ. Зөвхөн Англид гэхэд галт тэргэнд амжуулсан ажлын хөлсийг жилээр тооцвол 300 сая шахам ам.доллараар хэмжигдэхээр байгаа юм. Үүний ашиг тусыг олж харсан ажил олгогчид ч ажилтнуудаа эрт явахыг зөвшөөрөх хандлагатай болсон байна. 10 ажилтан тутмын дөрөв буюу 38 орчим нь гэртээ харих замдаа үлдсэн ажлаа цэгцэлж амждаг аж.
Гэхдээ ийм хичээнгүй ажилтнуудаас гадна ажлын цагаар ч олон нийтийн сүлжээгээ шалгадаг, мэдээллийн сайтуудаар зочилдог, онлайн худалдаан хийдэг, интернэтээр төлбөр тооцоо хийх гэх мэт хувийн ажлаа амжуулдаг ажилтнууд ч 10 хүн тутмын тавыг эзэлж байдаг гэсэн тоо бий.
