Б.НАРАНЗАЯА

Ерөнхий боловсролын сургуулийн сургалтын төлөв­лөгөөнд “Эрүүл мэнд” хичээлийг бие даасан цагтай байлгахыг шаардлаа. Дэлхий нийтээрээ өсвөр насныхны эрүүл мэндэд тулгамдаж буй асуудлыг бууруулах олон ажил  хийж байхад БСШУ-ы сайд тушаал гаргаж, ЕБС-ын сургалтын төлөвлөгөөнөөс “Эрүүл мэнд”-ийн хичээлийг хасч бусад хичээлтэй интеграцчилах ажлыг эхлүүлээд байгааг буруутгасан нь энэ. Хэвлэлийн хуралд эрүүл мэндийн чиглэлээр үйл ажиллагаа явуулдаг олон улсын болоод иргэний нийгмийн байгууллагын төлөөлөл оролцож эсэргүүцлээ илэрхийлсэн.

Учир нь, интеграц хийж буй биологи, биеийн тамирын хичээлүүд нь өөрийн судлах агуулгын багтаамж ихтэй, сургалтын орчин, техник тоног төхөөрөмжүүд нь онцлогтой, багшийн заах арга зүй, сургалтын технологи нь ялгаатай байдаг тул эрүүл мэндийн хичээлээр зайлшгүй эзэмшвэл зохих үндсэн мэдлэг, чадвар дадлыг нь оруулах боломжгүй гэж үзжээ.

Мөн энэ өөрчлөлт нь үндэслэл муутай судалгаа нотолгоогүй, хий мөнгө дэмий зарсан оновчгүй хувилбар болсон гэдгийг хэвлэлийн хуралд оролцсон төлөөлөлүүд хэлж байлаа. Иргэний нийгмийн 107 гаруй байгууллага нэгдэн өнгөрсөн сарын 16-ны өдөр БСШУ-ы сайд Л.Гантөмөрт ЕБС-ийн сургалтын төлөв­лөгөөнд “Эрүүл мэнд” хичээлийг бие даасан цагаар үлдээхийг шаардсан нотолгоо бүхий шаардлагыг хүргүүлсэн боловч өнөөдрийг хүртэл ямар нэгэн хариу өгөлгүй интеграцчилах ажлыг явуулсаар байгаа аж.

“Залуус ихэвчлэн эрүүл мэндийн боловсролыг өсвөр насандаа олсон байдаг. Өсвөр насандаа хүний мэдлэг, хандлага зан үйл бүгд төлөвшдөг. Энэ насандаа  хүүхдүүд эрүүл мэндийн боловсролыг зөв олж, эзэмшвэл цаашдаа иргэн хүн болон төлөвшиж ирээдүйн эцэг эх, удирдагч, манлайлагч нар болох ёстой. Гэтэл өнөөдөр энэ залуучуудын эрүүл мэндийн боловсролыг ингэж орхигдуулж байгааг бид эсэргүүцэж, энэхүү хичээлийг хасч интеграцчилах биш илүү сайжуулах хэрэгтэй байгаа” хэмээн “Youth lead” олон улсын залуучуудын эрүүл мэндийн байгууллагын ажилтан А.Нямдорж хэвлэлийн бага хурлын үеэр хэлсэн юм.  
Энэ асуудлаар “Ази ном­хон далайн залуучуудын сүл­жээний Монгол дахь ерөн­хий зохицуулагч М.Мяг­мар­сүрэнгийн байр суурийг сонсов. Тэрээр “Эрүүл мэнд хичээлийг хасч, интеграцчилснаар  сурагчдын ачааллыг бууруулж байна гэж Боловсролын яамнаас хариу өгсөн. Мэдээж бид үүнийг буруутгахгүй. Шинэчлэл хэрэгтэй. Гэвч шинэчлэл нэр нь дор хамгийн чухал суурь хичээл болох эрүүл мэндийн хичээлийг хасч, интеграцчилаад байгааг ойлгохгүй байна. БСШУЯ-наас 40 сургууль дээр зургадугаар сар хүртэл туршилт хийнэ гэж байгаа. Мөн бид энэ хичээлийг хасаагүй, интеграцчилж байна, туршиж байна гэсэн. Энэ зургадугаар сар гэхэд энэ туршилтаас ямар хариу гарах нь тодорхойгүй. Гэхдээ бид эрүүл мэндийн хичээл хасагдах байх гэж эмзэглээд байгаа. Учир нь, багш нарын дунд явуулсан судалгаагаар багш нар маань зүгээрээ болж байна гэсэн. Багш нарын хувьд нэмэлт цалингаа авахын тулд ингэж хэлээд байгаа юм” гэлээ. Багш нарын ажлын шалгуурт ямар ч хичээлийн багш байсан сурагчдын эрүүл мэндийн боловсролд анхаарал хандуулах ёстой гэсэн. Өөрөөр хэлбэл, багш нарын урамшуулын нэг шалгуур үзүүлэлт нь энэ болох учраас тэд сул орж ирэх урамшууллаа авахын тулд эрүүл мэндийн хичээлд тусгай цаг гарах шаардлагагүй гэж үзээд байгаа хэрэг. Гэтэл өөрийн гэсэн хичээлээ заах ёстой багш нар үүнд хэр анхаарч ажиллаж чадах бол гэдэг нь эргэлзээтэй...