Өсвөр үеийн 2015 оны улсын аварга шалгаруулах тэмцээний нээлтийн ажиллагаа өнөөдөр 14 цагаас Сонгинохайрхан дүүргийн 42-р сургуулийн байранд болох бөгөөд ирэх бямба гарагт шилдгүүд тодорно.
“Гацуурт” компанийн нэрэмжит тус тэмцээн энэ жил Монгол хүүхдийн спортын V наадмын хүрээнд зохион байгуулж байгаа гэдгээрээ онцлогтой юм. Монголын даамын холбооны уг тэмцээнд нийслэлийн болон орон нутгаас нийт 360 орчим өсвөрийн даамчид оролцож байна. Тэмцээн хөвгүүд, охид тус бүр долоо, 10, 13, 16 гэсэн дөрвөн насны ангилалд шилгүүдээ тодруулах юм. 2015 оны улсын аваргын медальтнууд ирэх дөрөвдүгээр сард Узбекстаны нийслэл Ташкент хотноо болох Ази тивийн АШТ, 11 дүгээр сард Нидерландын Хикен хотод болох ДАШТ-д оролцох эрхтэй болно.
Дашрамд сонирхуулахад, 2013 өсвөрийн дэлхийн аварга шалгаруулах тэмцээний 8-10 насанд Г.Дүүрэнбилэг мөнгөн медаль хүртэж, эх орондоо анхны медалийг авчирсан юм. Харин өнгөрсөн онд энэ насанд Б.Мөнхжин мөн л мөнгөн медаль хүртсэн.
