Японы мэргэжлийн сүмо бөхийн 69 дэх Их аварга Хакүхо М.Даваажаргал энэ сарын 15 буюу ирэх ням гарагт эх орондоо ирнэ.
Тэрбээр Хацү башёд түрүүлснээр сүмогийн түүхэнд дээдийн дээд амжилт тогтоон Тайхо их аваргын амжилтыг давж 33 түрүү авсан билээ. Японы үндэсний их спортын дээд амжилтыг эвдсэн түүнийг Мэргэжлийн сүмо бөхийн холбооны ерөнхийлөгч Хитаноуми “Хакүход одоогоор өрсөлдөгч алга даа” хэмээн хэлсэн нь түүнийг цагийг эзэлсэн Их аварга гэдгийг хүлээн зөвшөөрсөн хэрэг.
Энэ жилийн “Цагаан сар” буюу сар шинийн үеэр ирэх Мөнхбатын Даваажаргалд Монгол Улсын Хөдөлмөрийн баатар цол олгох тухай яриа олны дунд дэгдээд байгаа юм. Хэдхэн хоногийн өмнө Ерөнхий сайд Ч.Сайханбилэг Япон улсад айлчлах үеэрээ Их аварга Хакүхо М.Даваажаргалд “Монгол Улсын Соёлын элч” өргөмжлөл хүртээн албан ёсны элчээр томилсон гэрчилгээг 33 дугаартай дипломат паспортын хамт гардуулан өгсөн билээ.
