Их аварга Хакүхо М.Даваажаргал хэрэв энэ удаад түрүүлбэл мэргэжлийн сүмогийн шинэ дээд амжилт тогтоож, 33 түрүүгээр өнгөлөх нь ээ. Тайхо их аваргын амжилтыг ийнхүү эвдэж сүмогийн түүхэнд мөнхрөх юм.
Башё эхлээд 11 өдөр өнгөрөхөд бүх өдрийн тасалбар бүрэн зарагдаж дуусчээ. Хэрэв үлдсэн дөрөв хоногт бөхийн ордон үзэгчээр дүүрвэл энэ нь 18 жилийн дараа башёгийн бүх өдрийн тасалбар зарагдсан тохиолдол болох юм. Үзэгчдийг бөхийн ордонд авч ирж буй гол хүчин зүйл нь сонирхолтой барилдаан, өрсөлдөөн юм. Ялангуяа энэ башёд их аварга Хакүхогийн түүхэн дээд амжилт тогтоохоор зүтгэж буй нь хацү башёгийн гол үзүүштэй барилдаан болж байна.
Харүмафүжи хоёр унаатай байгаа. Харин Какүрюүгийн хувьд гурав унаснаар түрүүлэх бөхийн тооноос хасагдлаа.
Ийнхүү их аварга Хакүхо башёг итгэл төгс тэргүүлж, мэргэжлийн сүмогийн 33 дахь түрүүгээ хүртэх магадлал өндөр болсон. Хэрэв энэ тэмцээнд түрүүлбэл ирэх дөрөвдүгээр сард 1000 хүнийг хамарсан асар том хүлээн авалт Токио хотноо зохион байгуулахаар төлөвлөж байна хэмээн Миягино оякато сэтгүүлчдэд ярижээ.
