БНХАУ-ын ӨМӨЗО-нд болсон 500 грамм алтан гулдмайн байтай ар, өвөр Монголын 16 хүчит бөхийн барилдаанд улсын заан Ч.Санжаадамба түрүүлж, хагас кг алтан гулдмайн эзэн болжээ. Барилдаанд улсын заан М.Өсөхбаяр үзүүрлэсэн бөгөөд оролцсон бусад бөхөд тус бүр нь 5000 юанийн үнэтэй алтан зоос бэлэглэжээ.
Энэ удаагийн "Хасар" бөхийн барилдааныг ӨМӨЗО-ны Шилийн гол аймагт Бурхан группийн нэрэмжит болгон зохион байгуулжээ. Манайхаас тус барилдаанд улсын заан Ч.Санжаадамба, Б.Соронзонболд, М.Өсөхбаяр, улсын харцага Т.Өсөх-Ирээдүй, улсын начин Э.Энхбат, Ч.Баянмөнх, Б.Амарзаяа, Б.Сугаржаргал нар зодоглосон.
Өвөрмонголд өндөр байтай, олны анхаарлыг гойд татсан барилдаануудыг удаа дараалан зохиосоор байна. Ч.Санжаадамба зааны хувьд Монгол туургатны бөхийн барилдаанд хэд хэдэн удаа түрүүлсэн удаатай.
