Дуучин Тэйлор Свифт үнэнч шүтэн бишрэгчдэдээ туйлын хайртай гэдгээ Ребека Бортникер хэмээх бүсгүйд барьсан гэнэтийн бэлгээрээ дахин баталжээ. Тэйлор Свифтийн дуунд зориулан бяцхан видео хийж “Tumblr”-т нийтэлсэн Ребекагийн хөдөлмөр дуучин бүсгүйн сэтгэлийг ихэд хөдөлгөсөн бололтой. Түүнд хайрцаг дүүрэн бэлэг явуулжээ. “FedEx”-ийн шуудангийн хайрцгийг гараараа “SwiftEx” болгон өөрчилж бичсэн тус хайрцагт дуучны өөрөө бичсэн хэд хэдэн ил захидал, гэрэл зураг, хүзүүний зүүлт, мөнгөний хэтэвч байжээ. Хэтэвчин дотор 1989 ам.долларын чек байсан бөгөөд “Ребека, сургалтын төлбөрийн зээлнээс чинь 1989 ам.доллар хасагдлаа” хэмээн бичсэн байжээ. Тэйлор Свифтийн хамгийн сүүлд гаргасан цомог “1989” нэртэй билээ.
Тэйлор Свифт шүтэн бишрэгчдэдээ ингэж гэнэтийн бэлэг барьсан нь анхны тохиолдол биш. Тэрээр өнгөрсөн сард өөрийнх нь дууг дуурайж дуулсан бичлэгээ интернэтэд тавьсан нэгэн фэндээ мөн хайрцаг дүүрэн бэлэг илгээж байсан бол Коннектикут мужид амьдардаг сонсогчийнхоо хүүхдэд өөрийн биеэр очиж тоглоом бэлэглэсэн удаатай.
